കമ്മ്യൂണൽ പോളറൈസേഷനും പ്രതിക്രിയാവാദവും...
നിതിൻ നങ്ങോത്ത്
പാണ്ടിക്കടവത്ത് കുഞ്ഞാപ്പ ഇനി ഇന്ദ്രപ്രസ്ഥത്തിന് വേണ്ടി ഗ്ലൗസ്സണിയും. ഹരിതകേരളത്തിന്‍റെ കാഹളം പാർ‍ലിമെന്‍റിന്‍റെ അകത്തളത്തിൽ ഉച്ചൈസ്തരം ഇനിയങ്ങോട്ട് ഉദ്ഘോഷിക്കപ്പെട്ടേക്കും. ബീഫും ബിലീഫും വിഷയത്തിൽ ഒരു തീരുമാനമാകും. തികച്ചും ‘സ്വാഭാവികമായ’ ഒരുവിജയത്തിന് അഭിനന്ദനത്തിന്‍റെ പച്ചച്ചെണ്ടുകൾ!! ഒന്നേമുക്കാൽ ലച്ചത്തിന്‍റെ വിക്റ്ററിയിലും പുയിപ്പും താത്ത്വികപുച്ഛവുമായി മുദ്ര കാട്ടുകയാണ് പൊളിറ്റിക്കൽ ഔട്ട്ലുക്കേഴ്സ്. ജയത്തിലൊന്നും ബല്യ കാര്യമില്ല ഭായ്, വോട്ട് ഷെയർ! അതാണ് !!
കേരളത്തിൽ ഈ മാരകരോഗം വൈറലായിട്ട് കുറച്ചേ ആയുളളൂ. ജയിച്ചത് അംഗീകരിക്കുകയുമില്ല. തോറ്റത് സമ്മതിക്കുകയുമില്ല. റാഡിക്കലായ നിരീക്ഷണ ന്യായീകരണ വിശദീകരണ മഹാമഹത്തിൽ പ്യാവം ഞങ്ങ വോട്ടുവിരൽ ഞെക്കികൾ മൊയന്തായിപ്പോവും. റിസൽ‍ട്ടിന് മുന്നേ തന്നെ തൽ‍പ്പരർ ഇത്തരം വൈരുദ്ധ്യാത്മക അതിഭൗതീകവരട്ട് വാദത്തിന്‍റെ സ്ക്രിപ്റ്റ് പ്രിന്‍റെടുത്ത് ഷെയർ ചെയ്തിട്ടുണ്ടാവും. പ്രസ് ആന്‍റ് റിലീസ്.അനുഭാവി മുതൽ പ്രമാണി വരെ ഒരേ വാക്യത്തിന്‍റെ ചളിപ്പിൽ കടിച്ചുതൂങ്ങി നാറിപ്പെരങ്ങി... അപരനെക്കൂടി അംഗീകരിക്കാനുളള വിനയം എന്നാണിനി ഇബിടെ സിലബസിലാവുക?
അഹമ്മദ് സാഹിബിന്‍റെ അത്ര ലീഡ് ഇല്ലാത്തോണ്ട് കുഞ്ഞാലി സാഹിബിന് അഭിമാനിക്കാൻ വകയില്ലത്രേ. പാർ‍ട്ടിഗ്രാമത്തിൽ ഏത് കൊണ്ടോട്ടി മൂസയെ നിർ‍ത്തിയാലും കൈച്ചലാവുമത്രേ. ഹൈന്ദവഭീകരതയുടെ മുഖത്ത് മുസ്ലീംസഹോദരങ്ങൾ മുഷ്ടിചുരുട്ടി കീച്ചിയ പഞ്ചാണത്രേ മഹാനായ ജോജിയുടെ മലപ്പുറം വിജയം. എസ്.ഡി.പി.ഐ, വെൽ‍ഫെയർ പാർ‍ട്ടി, പി.ഡി.പി വിശ്വാസികളുടെ മനഃസാക്ഷീ ‘കുത്ത്’ ആണ് താമരവാട്ടത്തിന് നിദാനമെന്ന് മത ഇതര പണ്ധിതർ. സംസ്ഥാന ഭരണത്തിന്‍റെ വിലയിരുത്തലെന്ന് ഒരേ തൂവൽ പക്ഷികൾ.അല്ലേ അല്ലെന്ന് ജടായുപ്പക്ഷി. ചിറകരിയാൻ നോക്കേണ്ടെന്ന അർ‍ദ്ധനിമീലിത മന്ദഹാസവും.കേന്ദ്രഭരണ എടിഎം പൂട്ടൽ, ആയിരം ആവിയാക്കിയ തോന്ന്യാസത്തോടുളള ‘ഓർ‍ത്തോ ഓർ‍ത്തുകളിച്ചോളൂ’ മോഡൽ വാണിങ്ങാണിതെന്ന് മീശയെടുത്ത് താടിവെച്ചവർ. രാഖി കെട്ടിയവർ പറയുന്നു.മലപ്പുറം കാട്ടുപൂച്ചയുടെ വരവ് ഗീർ‍വനത്തിലേക്കല്ലേ, അവിടെ കാണിക്കാം വിശ്വരൂപമെന്ന്. ശരിക്കും ചിന്തകൾ കൊന്പുകോർ‍ക്കുന്പോൾ സി.പി.എമ്മിന് ഒരുലക്ഷത്തിലധികം വോട്ട് ജാസ്തിയാണ്. യുഡിഎഫിന് മൃഗീയലീഡ്. ബിജെപിക്ക് കുറഞ്ഞില്ല. നോട്ടക്കും നേട്ടമാണ്. ഐ മീൻ ആരാണ് തോറ്റത്. തോറ്റിട്ടില്ല.. തോറ്റിട്ടില്ല.. തോറ്റ ചരിത്രം കേട്ടിട്ടില്ല. തോൽ‍ക്കാൻ ചന്തുച്ചാപ്പന്‍മാരുടെ ജീവിതം ഇനിയും ബ്യാക്കി. ബിഡിജെഎസ്സുകാരെപ്പറ്റി ഇങ്ങനെയൊന്നും പറയല്ലേ മാഷേ, സ്വർ‍ഗ്ഗത്തിലെത്തിയാൽ പൂച്ച മാന്തും. രഹസ്യസമ്മന്തമൊക്കെ മയ്യാക്കിക്കോളീ പുളളാരെ. ഇമ്മോറൽ ട്രാഫിക്ക് ഏമാൻ സ്ട്രോങ്ങാ. പരസ്യ ബാന്ധവത്തിന് മാണിസാറിൽ നിന്ന് ദക്ഷിണ മാങ്ങണം. ചില യുഡിഎഫ് കോർപ്പറേറ്റ് ചാരന്‍മാർ പുതിയ പാലത്തിന് ടോൾ‍പിരിവ് സ്റ്റാർ‍ട്ടാക്കി. കൊണ്ടു നടന്നതും നീയേ ചാപ്പാ. കൊണ്ടുപോയി ജയിപ്പിച്ചതും നീയേ പാപ്പാനേ. എസ്ബിടി എസ്ബിഐ ലയനം പോലെ എന്തോ എവിടെയോ ഒന്ന് ചീഞ്ഞ് നാറുന്നുണ്ട്.
ആളുകൾ മതപരമായി സംഘടിക്കുന്നുണ്ട്. കാരണം അവർക്ക് ഒരുപാട് സങ്കടങ്ങളുണ്ട്. അവകാശങ്ങൾ നേടിയെടുക്കാനും ചോദിച്ച് വാങ്ങാനും തന്നില്ലെങ്കിൽ തട്ടിയെടുക്കാനും സംഘടിച്ചേ പറ്റൂ. മതേതരത്വ ഡയലോഗൊക്കെ ചുമ്മാ തട്ടിപ്പാണെന്നേ. അണ്ടിയോടടുക്കുന്പോഴറിയാം മാങ്ങയുടെ പുളി. ഭൂരിപക്ഷവർ‍ഗ്ഗീയത, ന്യൂനപക്ഷവർ‍ഗ്ഗീയത ഇതൊക്കെ ഒരുവാളിന്‍റെ ഇരുതലമൂർ‍ച്ചയാണ്. പിണക്കാനുളള ധൈര്യം ആർ‍ക്കുമില്ല.പണികിട്ടും. കൊളോണിയൽ ചിന്താസരണിയും നവലിബറലിസമൊക്കെ അങ്ങ് പള്ളീലോ മന്ദിരത്തിലോ ചർ‍ച്ചിലോ ചെന്ന് പറഞ്ഞാ മതി. അന്ന വിചാരം മുന്നെ വിചാരം. കാര്യവിചാരം പിന്നെ വിചാരം എന്നല്ലേ? ഹിഡൺ അജണ്ടകളുടെ അറ്റത്ത് ഒരു വിലാപമായി തൂങ്ങിയാടേണ്ടതല്ലല്ലോ ഈ സാക്രിഫൈസ് ലൈഫ്.നാവടക്കൂ... പണിയെടുക്കാം.
കാട്ടപ്പ അഥവാ കമ്മ്യൂണിസ്റ്റ് പച്ച ഒരു കള വർഗ്ഗ ചെടിയാണേലും അടിയന്തിര ഘട്ടത്തിൽ മുറിവുണക്കാൻ ബെസ്റ്റാ. പച്ച ലീഗിന്റെ ഒച്ച കേട്ട്, ഭാരത പര്യടനത്തിന് ഷൂ പോളിഷ് ചെയ്യുന്ന അമിത് ഷാ ഞെട്ടിക്കാണണം. ആതിദ്യ ബിർലാ പതഞ്ജലി ബ്രാന്റ് വിപണന മേളയാണ് ആഗമനോദ്ദേശമെന്ന് വെറുപ്പാളികൾ. 2019 തനിക്കാക്കുക എന്ന ഗോൾ സെറ്റിംഗിന് അഡ്വാൻസ്ഡ് ശുഭയാത്ര. 11 കേരളാ പ്രസ്റ്റീജ് മണ്ധലങ്ങൾ റാഞ്ചി പറക്കുന്ന ചെന്പരുന്ത് പ്രകടനത്തിന് കണ്ണോർത്തിരിക്കാം. മലർപ്പൊടിതള്ളലെന്ന് പരന്പരാഗത സൈദ്ധാന്തിക ബുൾഗാൻ താടിക്കാർ.
തമ്മിലടിച്ചും പുണ്ണിൽ ഉപ്പുരച്ചും രസിക്കുന്ന മുഖ്യ പാർട്ടികൾ ഇപ്പോഴേ അരയും തലയും നെറ്റിയിലെ മുറിവും തടവിയില്ലേൽ അന്ത്യകുദാശ ചൊല്ലേണ്ടി വരും. കരണ്ടിനും ഗ്യാസിനും ഉപ്പ് കർപ്പൂരാധികൾക്കും വെച്ചടി വെച്ചടി കേറ്റമാണ്. മഹിജമാരും ഷാജഹാന്മാരും പുനരവതരിച്ചേക്കും. കലക്ടർ ബ്രോയുടെ ബുൾഡോസർ പെർഫോർമൻസ് ജനം കൈയ്യടിച്ച് കാണുന്നുണ്ട്. സമരങ്ങളിലെ സമരസപ്പെടൽ തന്ത്രം അവർക്ക് റൊന്പതെരിയും. ഉദ്യോഗസ്ഥദുഷ്പ്രഭുത്വവും ഭരണ കൂട ഭീകരതയും ഉപദേശ പ്രളയ സാരോവരവും കാളകൂട സർപ്പമായി തിരിഞ്ഞ് കൊത്തിയേക്കും.
പബ്ലിക്ക് ഇന്ററസ്റ്റും, പബ്ലിസിറ്റി ഇന്ററസ്റ്റും രണ്ടും രണ്ടാണെന്ന് ആർക്കാണറിഞ്ഞുകൂടാത്തത്? കാനന രാജേന്ദ്രൻ മിക്കവാറും കരിന്പിൻതോട്ടം തേക്കിൻ കാട് മൈതാനമാക്കും. ലഗ്നത്തിൽ ഭ്രഷ്ടിന്റെ അപഹാരം കാണുന്നുണ്ട്. കേന്ദ്രത്തിൽ പവർ ഉള്ള ഒരു കൂട്ട്കെട്ടിനായി ക്യാൻവാസിംഗ് നടക്കുന്നുണ്ട്. വോട്ട് വിഹിത രാഷ്ട്രീയവും വോട്ട് ബാങ്ക് രാഷ്ട്രീയവും തലപ്പാവ് തുന്നിച്ചേർക്കുന്പോൾ അടിയങ്ങളുടെ കേരളാ തീപ്പെട്ടിപാർട്ടികൾക്ക് അവഗണനയും അവജ്ഞയും ആസൂത്രിത ചവിട്ടിക്കൂട്ടലും. വാക്കിലെങ്കിലും വിപ്ലവം ഫിറ്റ് ചെയ്തില്ലേൽ പിന്നെ എന്തോന്ന് ആക്ടിവിസം?. വയൽ ഞങ്ങളുടെതാണെങ്കിലും കൃഷി പാട്ടത്തിനെടുത്തവരൊക്കെ ഇങ്ങോട്ട് വയൽവരന്പിൽ പ്ലേകാർ‍ഡും കുത്തി കൂലി ക്രെഡിറ്റ് ചെയ്യുകയല്ലേ? ആരാണ് ശുദ്ധ കമ്മ്യൂണിെസ്റ്റന്ന് സംശയമുള്ളവർ ഗൂഗിളിൽ പരിതി നോക്കൂ. അതിനാൽ ഉറപ്പിച്ച് പറയട്ടെ മലപ്പുറം തോൽവി ധാർഷ്ട്യഭരണത്തിനുള്ള നാട്ടാരുടെ കരണമടച്ചുള്ള സ്മാഷ് തന്നെ.
പൊതുജന അഭിപ്രായം മൈൻഡ് ചെയ്യാതിരിക്കലാണ് പുതിയ കോർപ്പറേറ്റ് രീതി. ആളെ തീർത്താലും അരാജകത്വം വാണാലും അടിയന്തരാവസ്ഥയിൽ പുലർന്നാലും അളുകൾ ആളും തരവും നോക്കി വോട്ട് ഇട്ടോളും. സമയാ സമയങ്ങളിൽ ചെറിയ ചെറിയ ലാവണങ്ങൾ പണമായും പവറായും വീട്ടിൽ എത്തിച്ച് കൊടുത്താൽ മതി. പക്കാ പൊളിറ്റിക്കൽ വോട്ടൊക്കെ പണ്ട്. ദിപ്പോ പെടപെടാ പെടയ്ക്കുന്ന നല്ല പുത്തൻപണ പൊളിട്രിക്സാണ്. എക്സിക്യൂട്ടിവും ജുഡീഷ്യറിയും ലെജിസ്ലേറ്റീവും ഗാന്ധാരിക്ക് പഠിക്കുന്ന കമ്മ്യൂണൽ പോളറൈസേഷന്റെ വിഷക്കാലം. ജാതി ചോദിക്കുക പറയുക... മതം ആരായുക... അടിച്ച് അകത്താക്കുക. ഭൂരിപക്ഷ ഫാസിസിറ്റ് പ്രസ്ഥാനത്തിലേയ്ക്കും ന്യൂനപക്ഷ ഫാസിസിറ്റ് പ്രസ്ഥാനത്തിലേയ്ക്കും ഒഴിവുണ്ട്. തിരിച്ചറിയാത്ത രേഖയുമായി വന്നാൽ നേരിട്ടുള്ള നിയമനമാണ്. ഒരുപാടു പുണ്യ പുരാതന ആരാധനാലയങ്ങൾ നിങ്ങളുടെ ധൃതരാഷ്ട്രാലിംഗനത്തിനായി വീർപ്പമുട്ടി ഇരിപ്പുണ്ട്. ലെഫ്റ്റ് റൈറ്റ്... ലെഫ്റ്റ് റൈറ്റ്...
