പിണറായി പെരുമയും ലോക്നാഥ് ഗരിമയും
നിതിൻ നാങ്ങോത്ത്
ക്രൂരം, ശാന്തം, പാവം! ഒരാഴ്ച തിളച്ചുമറിഞ്ഞ പാൽ വാങ്ങി വെച്ചു. അമ്മയെ തല്ലിയാലും രണ്ടുണ്ട് ന്യായം എന്ന ബനാനടോക്ക് അച്ചട്ടായി.ന്യായീകരണത്തൊഴിലാളികൾ‍ക്കും ചാനലിൽ വിയർ‍ത്തവർ‍ക്കും ഇനി ധൈര്യമായി നെഞ്ചും വിരിച്ച് പുഞ്ചിരിക്കാം. ആക്രമണപ്രത്യാക്രമണ കമ്മിറ്റിക്കാർ അടുത്ത ഊഴത്തിനായി വാമപ്പ് ചെയ്യുക. നാലാം പ്രതിക്കായി പോലീസ് നാസിക്കിലേയ്ക്ക് പാഞ്ഞിട്ടുണ്ട്. ഇവിടെ നാസികയുടെ നേരെ താഴെയുളള ഒന്നാമനെ ഇക്കിളിയാക്കാൻ പോലും പറ്റീട്ടില്ല. ഇതിനെ ഇരട്ടത്താപ്പെന്നോ പരട്ടത്താപ്പെന്നോ കാർ‍ക്കിച്ചേക്കുക. ഓൺ ലുക്കർ ഷാജഹാൻ ഭാഗവതരെ കാക്കിക്കാവലിൽ നിയമപ്പരീക്ഷ എഴുതിക്കുന്നുണ്ട്. കുടിപ്പകയുടെ പ്രത്യയശാസ്ത്ര തോന്ന്യാസമായി കേരളരാഷ്ട്രീയം അധഃപതിക്കുന്നതിൽ ഒരുലോഡ് പുച്ഛം ടാഗ് ചെയ്യുന്നു. പണ്ട് വള്ളിട്രൗസറിട്ട കാലത്ത് കോട്ടി കൊണ്ട് കൊട്ടിനടിച്ച ആളെയൊക്കെ പ്രതികാരബുദ്ധ്യാ ടാർ‍ഗറ്റ് ചെയ്യുന്നത് പ്രബുദ്ധതയ്ക്ക് ഭൂഷണമല്ല.
പോലീസ് ഫോഴ്സിനെ ഇത്രയും സർ‍ഗാത്മകമായി ഉപയോഗിച്ച ഒരു ഭരണാധികാരിയെ കേരളചരിത്രത്തിൽ ഗൂഗിൾ ചെയ്താലും കാണാൻ പറ്റൂല. പൊതുചടങ്ങുകളിലെ പോലീസ് ബന്തവസ്സ് അവാച്യം അവർ‍ണ്ണനീയം. ദൂരപരിധിയിലേയ്ക്ക് കാക്ക പോലും പറക്കാൻ പേടിക്കുന്നു. ജനകീയനായ നേതാവും ഭയം എന്‍റെ നിശാവസ്ത്രം എന്ന അവസ്ഥയിലേയ്ക്ക് കോട്ടിടുകയാണോ? തെക്കൻ ലോബി രണ്ടു കണ്ണൂർ വിക്കറ്റുകൾ സമർ‍ത്ഥമായി പിഴുതെടുത്തു. ഓഫ് സ്പിന്നിൽ ഇ.പി ജയരാജൻ ഗള്ളിയിലും. ഫുൾടോസ്സിൽ ശശീമന്ത്രി ലോങ് ഓഫിലും!. ഇടനെഞ്ചു വരെ പറിച്ചു കൊടുത്ത റഫറി കം പച്ചപ്പനന്തത്ത ചോപ്പ് കാർ‍ഡ് കണ്ട് പുറത്തായി. കാലടിയിലെ മണ്ണ് ആഴത്തിൽ ചോരുന്നത് സ്ട്രെയിറ്റ് ഫോർ‍വേഡ് മുഖ്യൻ തിരിച്ചറിയണം. മാടിക്കുത്തിയാൽ ഡബിൾ‍മുണ്ടിനടിയിലെ ഇന്നർ കൂട്ടുകൃഷിക്കാർ തന്നെ ഊരിമാറ്റുന്ന ചന്തുച്ചാപ്പകോർ‍പ്പറേറ്റ് ച്യുതിയിലാണ് ലൈഫെന്ന് ഓർ‍മ്മ വേണം. കാവിക്കർ‍ച്ചീഫ് പോക്കറ്റിലുളള പോലീസ് ഏമാന്‍മാർ ഡ്രൈവിങ് സീറ്റിലുണ്ടെന്ന് പാർ‍ട്ടി ഇന്‍റലിജൻ‍സുകൾ. വിദേശഫണ്ട് കൈപ്പറ്റിയ ഏജന്‍റുമാർ വട്ടമിട്ട് പറക്കുന്നുണ്ടെന്ന് ജീ മന്ത്രി സുധാകരദേഹം. അങ്ങേയ്ക്ക് വേണ്ടി നാവേറ് നടത്തുന്നവരുടെ അംഗസംഖ്യ മെലിയുന്നത് ആലോചനയിലുണ്ടാവട്ടെ. കറണ്ട് മന്ത്രിയുടെ അമ്മദർ‍ശനത്തിലുളള ‘അടഞ്ഞ വാതിൽ നയം’ മാതിരി അശ്ലീലങ്ങൾ പരിക്ക് സാരമാക്കുകയേ ഉളളൂ. കാനം ഓൾ‍റൗണ്ടർ അപാര ഫോമിലാണ്. ഒരു സൂപ്പർ ക്യാപ്റ്റന്‍റെ ക്യാപ്പ് കളിയെഴുത്തുകാർ ഇതിനകം തന്നെ സമ്മാനിച്ചു കഴിഞ്ഞു. ഗ്രൗണ്ടിന്‍റെ എല്ലാ ഏരിയയിലേക്കുമുളള അദ്ദേഹത്തിന്‍റെ ഷോട്ടുകൾ സ്ട്രോങ് ആവുന്നതാണ് കാരണം. അഗ്നിക്ക് മീതെ നടന്ന് പാർ‍ട്ടിയെ നയിച്ച സഖാവ് വർ‍ഗീസിനെ കൊടുംകുറ്റവാളിയുടെ കരിന്പട്ടികയിൽ പ്രതിഷ്ഠിച്ചത് റേഷൻ‍കാർ‍ഡിൽ പേരുളള കമ്മ്യൂണിസ്റ്റുകൾ‍ക്ക് ദഹിച്ചിട്ടില്ല. സഖാവ് നിവിൻ‍പോളിയെ തലശ്ശേരിയിൽ തുറന്ന വാഹനത്തിൽ രക്തഹാരമണിയിച്ചത് ഒട്ടും.
തണലേകേണ്ടവർ താണ്ധവമാടുന്നെന്ന തത്തമ്മച്ചുണ്ടൻ കമന്‍റ് വന്നുകഴിഞ്ഞു. പനിച്ചാൽ റെസ്റ്റടുക്കേണ്ട കട്ടിൽ നാലുകാലും വെട്ടിക്കീറി അടുപ്പിൽ വെച്ചതാവാം പരിഭവത്തിന് ഹേതു. ഉപദേഷ്ടാക്കളൊക്കെ കൂടെ നടന്ന് കാലിൽ ചവിട്ടാതിരിക്കാൻ ഒരു കണ്ണുവേണം.തോക്ക് സാമിക്കൊക്കെ വേഷം നൽ‍കുന്നത് ഊർ‍വ്വശി തീയേറ്റേഴ്സിന് അപമാനമാണ്. കണ്ണൂർ േസ്റ്റഷനിലെ എടോ സുകുമാരാ വിളിയൊക്കെ അത്രവേഗം കേരളം മറക്കില്ല. ശുംഭനശബ്ദതാരാവലിയൊക്കെ കോടതിവളപ്പിലെങ്കിലും കാണും. കേന്ദ്രത്തിലെ കാവിക്കുതിപ്പ് കാണുന്പോൾ ബുദ്ധിയുളള കാക്കിക്കുപ്പായക്കാരൊക്കെ ലാത്തി സുഷിരവാദ്യമാക്കാൻ ചാൻ‍സുണ്ട്. കാക്കിക്കുളളിലെ ചോപ്പന്‍മാരെ മുദ്രാവാക്യം അപ്ഡേറ്റ് ചെയ്ത് കാക്കിക്കുളളിലെ കാവിക്കാരേ ആക്കുക. പാർ‍ട്ടിനയം, പോലീസ്നയം, സർ‍ക്കാർ‍നയം മൂന്നിനേയും ഒരേ തൊഴുത്തിൽ കെട്ടുക.ഒന്നാംപിറന്നാൾ കേക്ക് മുറിക്കാൻ മാസങ്ങളേയുളളൂ.ഇതുപോലെ എല്ലാ അപ്പീലുകളെയും നെവർ‍മൈന്‍റ് ചെയ്യാനുളള സ്ഥൈര്യവും ധൈര്യവും വടക്കൻ ലോബി ചങ്കിൽ തന്നേക്കും. പ്രസ്ഥാനം ഉരുവം കൊണ്ട മണ്ണിൽ പിണറായി പെരുമവിളിച്ചോതി മഞ്ജുവാര്യർ തില്ലാന ആടിക്കഴിഞ്ഞു. കലാപത്തിൽ നിന്ന് കലയിലേക്ക് ഒരു ‘പാ’ മടക്കേണ്ട ദൂരമേയുളളൂവെന്ന് മാധ്യമസിൻ‍ഡിക്കേറ്റുകളേയും ഭരണകൂടഭീകരതക്കാരെയും പഠിപ്പിച്ചാലും പ്രഭോ!! എല്ലാറ്റിനും പേനയുന്തുന്ന, വാചകബഹുലമായ ജീവിതം നയിക്കുന്ന ഒരൊറ്റ ബുജിവർ‍ഗ്ഗവും എതിരഭിപ്രായം വിളന്പിയിട്ടില്ല. ഹെഡ്മാഷെ പേടിയില്ലാത്ത കുട്ടികളുണ്ടാവുമോ? സഹശന്പളംപറ്റികളുണ്ടാവുമോ? അവാർ‍ഡ്, റിവാർ‍ഡ്, പേ വാർ‍ഡ്, അക്കാദമി, ബോർ‍ഡ് ഈസിചെയറുകൾ എന്തിന് കളയണം?
അവർ പതിനാറ് പേരായിരുന്നു. അരയിൽ ബെൽ‍റ്റ് ബോംബും കൈയിൽ റിമോട്ട് കണ്‍ട്രോളുമായി പാഞ്ഞടുത്ത ഡത്ത് വളണ്ടിയേഴ്സ്. പുലിപ്രഭാകരന്‍റെ പാർ‍ട്ടിയിലെ വംശനാശം വന്ന ഇങ്ങേയറ്റത്തെ കണ്ണികൾ. ലോകനാഥന്‍റെ ഫോഴ്സ് ഷേക്ക്ഹാന്‍റ് കൊടുത്ത് ഓരോ ഗ്ലാസ് മോരും വെളളവും വാങ്ങിക്കൊടുത്ത് കുശലാന്വേഷണം നടത്തി.ഇതിനിടയിൽ സുരഭിയേക്കാൾ മികച്ച അഭിനേത്രിയായ ജിഷ്ണുവിന്‍റെ അമ്മ വിടമാട്ടേ നടിച്ചു. കൂട്ടുകലാകാരന്‍മാരും ഫ്ളാഷ്മോബ് കളിച്ചു. കുറ്റിക്കാട്ടിൽ ഒളിച്ചിരുന്ന കൊടും കുറ്റവാളികളായ ഷാജിർ‍ഖാൻ ഭാര്യാസമേതനായും ഷാജഹാൻ ഒറ്റയ്ക്കും ചാടിവീണു. സർ‍വ്വരാജ്യചാനൽ‍പ്പടയും ഒപ്പം ചാടി. ഇതാണ് ശരിക്കും അവിടെ നടന്നത്. അയിനാണ് ആ കോങ്ക്രസ്സുകാരും ബീജേപ്പിക്കാരുമൊക്കെ ബന്ദർ‍ത്താൽ ആഘോഷിച്ചത്. മന്ത്രിസഭയെ ആടിയുലച്ചത്... തീവ്രവാദികളിലൊരാളായ നീലക്കുപ്പായക്കാരനെ തേങ്ങമുരുടി എറിയുന്നത് പോലെയാണ് ഒരു പോലീസ് ഏമാൻ ഷോട്ട്പുട് ചെയ്തത്. പാവം, ആ പാവത്തിന്‍റെ കഴുത്തൊക്കെ അവിടെത്തന്നെ ഉണ്ടോ ആവോ? ആരിക്കാടാ ഇനിയും മോരും വെളളം വേണ്ടത് എന്ന മനോജ് അബ്രഹാം സാറിന്‍റെ കുശലാന്വേഷണം അസ്സലായി. എല്ലാരും അവിടെ ഇരിക്കൂ. കുറച്ച് തൈരും കൂട്ടി ഊണും കഴിച്ച് വീട്ടീപ്പോയാമതി എന്ന അദ്ദേഹത്തിന്‍റെ സ്നേഹപ്രകടനവും ഉണ്ട പൊറോട്ടക്ക് നന്ദിയില്ലാത്ത കേമറക്കാർ ഡബ്ബ് ചെയ്തു കളഞ്ഞു. കുരുക്ഷേത്ര യുദ്ധ സമയത്ത് കണ്ണൂരിൽ എസ് പിയായിരുന്ന സാറിന്‍റെ കർ‍മ്മയോഗയെപ്പറ്റി അവിടുത്തെ ബസ്ഷെൽ‍ട്ടറുകളോടും പാർ‍ട്ടിസ്തൂപത്തോടും ചോദിച്ചാ മതി. സർ‍വ്വ പാർ‍ട്ടി കില്ലാടികളേയും നിന്ന നിൽ‍പ്പിൽ മുളളിപ്പിച്ചിട്ടാണ് സർ ട്രാൻ‍സ്ഫർ വാങ്ങിച്ച് പോയത്. തലസ്ഥാനത്തെ കെഎസ്യു കുഞ്ഞാടുകളുടെ ഭാഗ്യം. തല അവിടെത്തന്നെയുണ്ടല്ലോ?
എസ്എഫ്ഐ വർ‍ദ്ധിതവീര്യത്തോടെ സടകുടഞ്ഞെഴുന്നേറ്റു കഴിഞ്ഞു. വെളളാപ്പളളികോളേജ് തവിടുപൊടിയാക്കിയിട്ടുണ്ട്. കാഴ്ചക്കാരായി ഒരുബസ്സ് പോലീസ്.ഉടയാൻ ബാക്കിയായത് എബിവിപി നോട്ടമിട്ടിട്ടുണ്ട്.തടയലില്ല. തടവലില്ല. ഗൂഢാലോചനയില്ല. ഔദ്യോഗികകൃത്യനിർ‍വഹണ തടസ്സമില്ല. ബഹ്റ ഗെയിമിന് ഭീഷണി സുപ്രീംകോർ‍ട്ടിൽ നിന്നുയർ‍ന്നു കഴിഞ്ഞു. സെൻ കഥകൾ കേട്ട് കോടതി വിജിലന്‍റായി. ജിഷ കേസിലെ അലംഭാവത്തിന് ഡിജിപിയെ മാറ്റിയെങ്കിൽ ജിഷ്ണുകേസിലെ അഹംഭാവത്തിന് പ്രസ്തുത സ്ഥാനം ഇളകിയോ? ഒരമ്മയുടെ അഞ്ചുദിവസത്തെ ആശുപത്രി വിലാപത്തിന് വിലയില്ലേ.സെൻ‍കുമാർ തിരിച്ചുവന്നേക്കും. ചിലതൊക്കെ പഠിപ്പിക്കാനും വേറെ ചിലരെയൊക്കെ അകത്തിടാനും. ഈ സീസണിലെ കേരളക്കളി എന്തായാലും തീപ്പാറും. ഫോമൊക്കെ വീണ്ടെടുത്ത് സാക്ഷാൽ ഇപി സാർ വീണ്ടും പാഡണിയാൻ ചാൻ‍സുണ്ട്. പഴയ ചാർ‍ജ്ഷീറ്റ് പുതിയ വിജിലൻ‍സ് പിച്ചിച്ചീന്തി കാറ്റിൽ പറത്തിയേക്കും. അങ്ങനെയെങ്കിൽ പിണറായി ടീമിന്‍റെ ഓപ്പണിങ്ങിൽ കീറോൺ പൊളളാഡ് വന്ന കരുത്താകും. വിമർ‍ശനപീരങ്കി ഉണ്ടകളെ സ്പീക്കറുടെ ചെയറുപോലെ തോണ്ടിച്ചാടിക്കളയും. ശശീന്ദ്രൻ മന്ത്രിയും കൂടി ശുചീന്ദ്രം കൈമുക്ക് പരീക്ഷയും കൂടി പാസായാൽ വീ വാണ്ട് സിക്സർ! ചാർ റൺസ് കേ ലിയേ!! കേരള രഞ്ജി ടീമിന്‍റെ പുതിയ കോച്ച് വാട് മോർ കൂടി ചില ശ്രീലങ്കൻ യുദ്ധതന്ത്രങ്ങൾ കൂടി ഓതിക്കൊടുത്താൽ ആയിരം വി‘ജയസൂര്യ’ന്‍മാർ കത്തിപ്പടരും.പകയുടെ കനൽ‍വഴികൾ കൂടുതൽ പ്രശോഭിതമാവും.ഏതായാലും മീഡിയക്കാർ‍ക്കിനി ചാകരക്കാലമാണ്. വക്കീലന്‍മാരുടെ ട്രോളിങ് നിരോധനത്തിനും അറുതിയായേക്കും.യന്ത്രത്തോക്കിന്‍റെ ആർ‍ജവവുമായി സിന്ധുസൂര്യകുമാറൊക്കെ തിരിച്ചെത്തിയിട്ടുണ്ട്. കാണുക. കവർ സ്റ്റോറി. പലരുടെയും കബറടക്കം തത്സമയം !!
