കൊച്ചച്ഛൻ അഥവാ കൊച്ചിന്‍റെ ‘അച്ചൻ'
അ
ഗ്നിമീതേ പുരോഹിതേ!! പുരോഹിതരിൽ ചിലരുടെ നടത്തം അഗ്നിക്ക് മീതെയാകുന്നു. യത്തീംഖാനയിലെ കുട്ടിക്കൂട്ടം കൊള്ളിമുട്ടായി പ്രലോഭനത്തിൽ വീണ് അടിപ്പെട്ടുപോവുന്നു. ശാന്തിക്കാരന്‍റെ കൈക്രിയയിൽ ആശിർ‍വദിക്കപ്പെട്ട് അമ്മൂമ്മ. നമ്മുടെ നാടും പുരോഗമിക്കുന്നുണ്ട്. പീഡോ ഫീലിയയുടെ പാരഡൈസ്. അന്ത്യ പ്രലോഭനത്തിന്‍റെയും സന്ധ്യ പ്രലോഭനത്തിന്‍റെയും പറുദീസ. വേദം പറഞ്ഞു കൊടുക്കേണ്ടവർ ബീജം പകർ‍ന്നു കൊടുക്കുന്നതിലെ മെറ്റാമോർ‍ഫസിസ് എത്ര തലപുണ്ണാക്കിയിട്ടും പുടി കിട്ടണില്ല. ഗണിതമേധാവിയുടെ മേലിടപെടലുകളിൽ ശിഷ്യഗണങ്ങൾ പരാതി എഴുതിക്കഴിഞ്ഞു. അയൽ‍പ്പക്കത്തെ അരവയർ നിറയാപ്പെണ്ണിന് മുഴുവയർ സമ്മാനിക്കുന്നവരെ പ്രൊട്ടക്റ്റ് ചെയ്യാൻ ആൾ‍ബലം, അധികാരബലം, ക്ഷേമസമിതി ബലം!! സദാ ‘ജാര’ കേരളം, സണ്ണിലിയോണിന്‍റെ ശാരീരിക ചേരുവകൾ പോലെ മലർ‍ന്നു കിടന്നുറങ്ങുകയാണ്. കുഞ്ഞുടലേ കേഴുക. പെണ്ണുടലേ പൊറുക്കുക.
നാലു വയസ്സുകാരിയും പതിനൊന്നുകാരിയും ആത്മഹത്യ പരിശീലിച്ചു. അനാഥബാല്യങ്ങളെ കശക്കിയെറിയുന്ന പിശാചുക്കൾ തൂവെള്ള തൂവി അട്ടഹസിക്കുന്നുണ്ട്. അഞ്ചുവയസ്സുകാരിയെ മഞ്ച് കാട്ടി കീഴടക്കിയ കഥ വിളന്പുന്നവന് ലൈക്കോടു ലൈക്ക്!! കൗമാരക്കാരിയെ ഭോഗിക്കാൻ പൂതി എന്ന് വീരസ്യം പറഞ്ഞയാൾ‍ക്ക് നെറ്റിപ്പട്ടം കെട്ടിയ സ്വീകരണം. ഒത്താശ, കൂട്ടിക്കൊടുപ്പ്, കൂടിക്കിടപ്പ്, കെർ‍പ്പം ഒളിപ്പിക്കൽ, ഓർ‍ഫനേജിംഗ്, ദത്താപഹാരം!! ചോദിക്കാനും കോളറേൽ കുത്തിപ്പിടിക്കാനും ആളില്ലേൽ കേരളം ചന്ദ്രോത്സവ നിലാവിൽ മുങ്ങിക്കുളിക്കും. വൈശികതന്ത്രം വിശുദ്ധ ഗ്രന്ഥപ്പട്ടികയിലേയ്ക്ക് പ്രീപബ്ലിക്കേഷൻ ചെയ്യപ്പെടട്ടെ. വിശുദ്ധ പാപങ്ങളുടെ ഉടൽ ഉത്സവം! പച്ചക്കാമനകളുടെ വാലനക്കൽ ഫെസ്റ്റ്!! ഞരന്പുകളുടെ നാടേ, ഏത് പൂച്ചയ്ക്കാണ് മീൻ വേണ്ടാത്തതെന്ന നിന്‍റെ അർ‍ദ്ധമന്ദസ്മിത ചോദ്യത്തിൽ ഉത്തരം തൊണ്ടയിലുടക്കുന്നു.
അറിയാതെ ജനനിയെ പരിണയിച്ചൊരു യവന തരുണന്‍റെ കഥയെത്ര പഴകി? പുതിയ കഥയെഴുതുന്നു വസുധയുടെ മക്കളിവർ. വസുധയുടെ വസ്ത്രമുരിയുന്നു. പണ്ട് പത്തിൽ പഠിച്ച ചരമഗീതമാണ്. അച്ഛനെ കൊന്ന് അമ്മയെ വിവാഹം കഴിച്ച്, അതിൽ കുട്ടികളെയും ജനിപ്പിച്ച ഈഡിപ്പസിനെ അറിഞ്ഞപ്പോൾ തലകറങ്ങിപ്പോയിട്ടുണ്ട്. ഇങ്ങനെയൊക്കെ നടക്കുമോ? എന്നാൽ ഇന്ന് ഓരോ പുതിയ വസ്തുതകളും തിരിച്ചറിയുന്പോൾ ഈഡിപ്പസൊക്കെ എന്ത്? നമ്മൾ മലയാളികൾ വേറെ ലെവലാണ്. വേറെ വേവ് ലെംഗ്ത്താണ്. സ്വന്തം കുഞ്ഞുങ്ങളിൽ നാനോ ടെക്നോളജി അപ്ലൈ ചെയ്ത എത്രയെത്ര യമകിങ്കരർ? ദർ‍ശന സുഖവും സ്പർ‍ശന സുഖവും തേടിയലയുന്ന ന്യൂറോൺസുകൾ? അടുത്ത വീട്ടിലെ ആലയിൽ നിന്നും പശുവിനെയും അഴിച്ചെടുത്ത് മൃഗരതി ആഘോഷിക്കുന്ന ഗസറ്റഡ് ഏമാൻ.ശ്വാനഭോഗവും കോഴിക്രിയയും, കുണ്ടൻ അറ്റംപ്റ്റും ഒക്കെയായി ദിനേന എത്രയെത്ര പിരാന്തുകൾ റിപ്പോർ‍ട്ടു ചെയ്യപ്പെടുന്നു. നാണക്കേട് കൊണ്ട് റിലീസ് ചെയ്യപ്പെടാതെ പോകുന്ന ബ്ലോക്ബാസ്റ്റാഡ് കന്പിക്കഥകൾ സമാഹരിക്കപ്പെട്ടാൽ അവകാശികളുടെ ഉടയോർ ‘വിലാസിനി’ പോലും ഒന്നു വിയർ‍ക്കും.
മുക്കിന് മുക്കിന് സർ‍ട്ടിഫൈഡ് റെഡ്സ്ട്രീറ്റുകൾ നിർ‍മ്മിച്ചാലേ ഇനി നമ്മുടെ കുഞ്ഞിമക്കൾ‍ക്കും അമ്മൂമ്മമാർ‍ക്കും രക്ഷയുള്ളുവെന്ന് തോന്നുള്ളു. അല്ലേൽ ഇനിയും രണ്ടര വയസ്സുകാരിയുടെ ചുണ്ടുകൾ വിണ്ടുകീറപ്പെടും. എൺപത്തിനാലുകാരി അമ്മൂമ്മയുടെ തുടയിടുക്കുകൾ വികൃതമാക്കപ്പെടും. ഉദ്ധൃതലഗാനുമായി പടയോട്ടം നടത്തുന്നവരെ തടയിടാൻ ഒരു ഏജൻസിക്കും പറ്റുമെന്ന് തോന്നുന്നില്ല. മത−രാഷ്ട്രീയ തൽപരകക്ഷികൾക്കൊക്കെ കൃത്യമായ ഹിഡൻ അജണ്ട കണ്ടേക്കാം.എന്‍റെ ശരീരമാണ് എന്‍റെ സന്ദേശം എന്ന രീതിയിലേയ്ക്ക് കാര്യങ്ങൾ പോകുന്പോൾ തനിക്ക് താനേ തുണ എന്ന എഞ്ചുവടി മനഃപാഠമാക്കേണ്ടി വരും. സെൽ‍ഫ് ഡിഫന്‍റ് കോഷ്യന്‍റിന്‍റെ ആദ്യപാഠങ്ങൾ നമ്മുടെ പിഞ്ചോമനകൾ അറിഞ്ഞെടുത്തില്ലെങ്കിൽ ഏതേലും ദൈവദൂതർ അവരെ കുടഞ്ഞു കീറും. പാതിരിക്കോ പള്ളിക്കാരനോ ശാന്തിക്കാരനോ നുണഞ്ഞ് രസിക്കാനുളള ലോലിപോപ്പല്ല നമ്മുടെ പൊന്നോമനകൾ.
അച്ചനിൽ നിന്ന് അച്ഛനിലേക്കുളള ദൂരം ഖരത്തിൽ നിന്ന് അതിഖരത്തിലേക്കുളള (ച−ഛ )ഒരു ചുരുൾ അടക്കം മാത്രം. സത്യത്തിന്‍റെ ചുരുൾ നിവരുന്പോൾ പ്രബുദ്ധ കേരളം പൊളളിയടരുന്നു. ഒളിപ്പിച്ചു വെച്ച ദിവ്യഗർ‍ഭങ്ങളുടെ ഉച്ചനീചത്വങ്ങൾ, അന്ത്യപ്രലോഭനകഥകൾ കേൾ‍ക്കേണ്ടി വരുന്പോൾ നമ്മുടെ അമ്മമാർ‍ക്കെങ്കിലും ഇരട്ടച്ചങ്കുണ്ടാവട്ടെ.
നമ്മുടെ സിനിമകളും സീരിയലുകളും അഗമ്യഗമനവീരേതിഹാസങ്ങളെ ഇഞ്ചക്റ്റ് ചെയ്താൽ വളരുന്ന തലമുറയിൽ നിന്ന് അത്തരം ഔട്ട്പുട്ടുകളേ പ്രതീക്ഷിക്കേണ്ടൂ. അമ്മയുടെ കുളിയും സിസ്റ്ററുടെ മാസമുറയും വാട്സാപ്പിലൂടെ കുത്തിയൊഴുകുന്ന കാലം വിദൂരമല്ല. അത്രമേൽ രോഗാതുരമാണ് സെക്സ്റ്റിംഗിൽ അഭയം കണ്ടെത്തിയിരിക്കുന്ന പുതുതലമുറയുടെ അധോഗമനം!!
ഇരയുടെ ചിത്രങ്ങൾ ഷെയർ ചെയ്യാനുളള മത്സരം വാട്സാപ്പിൽ തപസ്സിരിക്കുന്നവർ‍ക്ക് അറിവുളളതാണല്ലോ? വേട്ടക്കാരും കുടുംബവും വലവിരിച്ച് നിയമസുരക്ഷയുടെ തണൽ‍പ്പന്തലിൽ. കാമുവിന് നേക്കഡ് സെൽ‍ഫി ഷെയർ ചെയ്യുന്നവരെങ്കിലും ഓർ‍ക്കുക. ഇപ്പം ദുഃഖിച്ചാൽ പിന്നെ സൂക്ഷിക്കേണ്ടി വരില്ല. ഒരു വിശുദ്ധപാപവും ദിവ്യഗർ‍ഭവും. ഗുരുഭൂതരുടെ ബീജസങ്കലന നിയമങ്ങൾ പല ദുരാചാര മാസമുറയും തെറ്റിച്ചേക്കാം. വേലി തന്നെ വിളവെടുപ്പ് നടത്തട്ടെ.
പറുദീസാ നഷ്ടവും പേറി ആരെങ്കിലും അവതരിച്ച് എല്ലാം ശരിയാക്കിത്തരുമെന്ന് ബർ‍തേ വ്യാമോഹിക്കരുത്. ബന്ധപ്പെട്ടവർ‍ക്ക് പത്തൊന്പതാം തീയതിയും ബ്ലോക്ക്ഡ് ടൂർ‍ണ്ണമെന്‍റിൽ ഓപ്പൺ ചെയ്യാനുണ്ട്. ഹൈദ്രാബാദ് നാനോ ടൂർ‍ണി. നിങ്ങൾ നാലാമത്തെ ആണിയുമായി കാത്തിരിക്കു. ഞങ്ങളീ ശുഭ്രതയൊന്നു കഴുകി വെളുപ്പിക്കട്ടെ. ആ മേൻ (Man)!!. ആ മേൻ നീ തന്നെ.
