വി.പി സത്യനെന്ന ക്യാപ്റ്റൻ
സംഗീത്
ജൂലൈ 18 ഓർ‍മ്മിക്കപ്പെടാതെ കടന്നു പോയപ്പോൾ അതൊരു നന്ദികേടിന്റെ ബാക്കിപത്രമായിരുന്നോ എന്ന സംശയം ബാക്കിയാകുകയാണ്. ബ്രൂണോ കുട്ടിൻഹോ എന്ന മുൻ ഇന്ത്യൻ സ്ട്രൈക്കർ ആരാധനയോടെ, അതിലേറെ ആദരവോടെ കേരളത്തിന്റെ മുൻ സ്റ്റോപ്പർ ബാക്കിനെ വിശേഷിപ്പിക്കുന്നത് ഇന്ത്യൻ ഫുട്ബോളിലെ ഏറ്റവും ടഫ് ആയിരുന്ന ഡിഫൻ‍ഡർ എന്നാണ്. മനസ്സാക്ഷിയില്ലാത്ത ടാക്ലിംഗുകളിലൂടെ ആക്രമണങ്ങളുടെ മുനയൊടിച്ചു കളയുന്ന കരുത്തനായ പ്രതിരോധനിരക്കാരൻ എന്നത് കളിവിവരണങ്ങളിലൂടെ മാത്രം നമ്മളിലേയ്ക്ക് പകർ‍ന്നു നൽ‍കപ്പെടുന്ന ഒരനുഭവമാകുന്നത് ഒരൽ‍പ്പം ദയനീയമാണ്. വേറെ നിവൃത്തിയില്ല എന്നത് കൊണ്ട് മാത്രം നമുക്ക് വിവരണങ്ങളെ ആശ്രയിക്കാതെയും വയ്യ. ഐ.എം വിജയന്‍റെ പോലും അപൂർ‍വ്വം വീഡിയോകളെ ലഭ്യമുള്ളൂ എന്നിരിക്കെ 90 കളിലെ ഒരിന്ത്യൻ പ്രതിരോധ നിരക്കാരനെ കളി കണ്ടിട്ടുള്ളവരുടെ വാക്കുകളിൽ കൂടെ മാത്രമേ പുനർ‍നിർ‍മ്മിച്ചെടുക്കാൻ സാധിക്കൂ. നിർ‍ദ്ദയനായ, കരുത്തനായ, ബോൾ ഫീഡറായ ഒരിന്ത്യൻ ഡിഫൻ‍ഡർ എന്ന രൂപത്തിന് പക്ഷെ ഒരേയൊരു പേരെ യോജിക്കുകയുമുള്ളൂ. വി.പി സത്യൻ. ജർ‍ണയിൽ സിംഗിന് ശേഷം ഇന്ത്യൻ ഫുട്ബോൾ കണ്ട ഏറ്റവും മികച്ച ഡിഫൻ‍ഡർ എന്ന വിശേഷണം അതിശയോക്തിയല്ല. സ്പിരിറ്റഡ് യൂത്തിൽ തുടങ്ങി ലക്കി സ്റ്റാറിലൂടെ കേരള പോലീസിലേയ്ക്ക്. അവിടെ നിന്നും ഇന്ത്യൻ ടീമിലേക്ക് കടന്നു ചെന്ന ഡിഫൻ‍ഡർ ഗ്രൗണ്ടിൽ അക്ഷരാർ‍ത്ഥത്തിൽ നായകനായിരുന്നതുകൊണ്ട് തന്നെ കളിച്ചിരുന്ന ടീമുകളുടെ നായകപദവി അയാളിലേയ്ക്ക് സ്വാഭാവികമായി എത്തിപ്പെട്ട ഘടകം മാത്രമായിരുന്നു.
വിജയനും പാപ്പച്ചനും ഷറഫലിയും ചാക്കോയും കുരികേഷ് മാത്യുവും ചാക്കോയും ജാബിറും ലിസ്റ്റനുമൊക്കെ അടങ്ങിയ കേരള പോലീസ് ഒരു കാലഘട്ടത്തിലെ കേരള ഫുട്ബോളിന്റെ തന്നെ നേർ‍കാഴ്ചയാണ്. അവരുടെ ഇടയിൽ. നിർ‍ദ്ദയം ആക്രമണങ്ങളുടെ മുനയൊടിക്കുന്നവനെന്ന പേരുമായി നിറഞ്ഞു നിന്നവൻ. യൂട്യുബിൽ ഒരു ക്ലിപ്പ് പോലും ലഭ്യമല്ലാത്ത അവസ്ഥയിൽ പഴയ തലമുറയുടെ കളി വിവരണങ്ങളിലൂടെ, അല്ലെങ്കിൽ സന്തോഷ്‌ ട്രോഫിയിലെ കമേന്ററ്ററുടെ ആവേശം തുളുന്പുന്ന വാക്കുകൾ എന്ന അവ്യക്തമായ ഓർ‍മ്മയിലൂടെ ജീവിക്കുന്ന ഒരു ഫുട്ബോളർ. ചാക്കോയിൽ നിന്ന് സത്യനിലേയ്ക്ക്, തോബിയാസിലൂടെ പാപ്പച്ചനിലേയ്ക്ക് എന്നിങ്ങനെ സതീഷ്‌ ചന്ദ്രന്‍റെ (പേര് തെറ്റിയിട്ടില്ല എന്നാണ് വിശ്വാസം) ശബ്ദത്തിൽ മനക്കണ്ണിൽ നീക്കങ്ങൾ കണ്ടെടുക്കാൻ മാത്രം ഭാഗ്യമുണ്ടായിരുന്ന ഒരു കൂട്ടം ഫുട്ബോൾ ഭ്രാന്തന്മാരുടെ മനസ്സിൽ സ്ഥിര പ്രതിഷ്ഠ നേടിയ ഫുട്ബോളർ. 90കളിൽ തന്‍റെ പീക്കിൽ കളിച്ചു കടന്നു പോയൊരു ഇന്ത്യൻ ഫുട്ബോളറുടെ നല്ല കാലത്തെ രേഖപ്പെടുത്തുന്ന അടയാളങ്ങളുടെ കുറവ് ഇന്ത്യൻ ഫുട്ബോളിന്റെ തന്നെ അന്നത്തെ അവസ്ഥയുടെ പ്രതീകമാണ്. ഒരു സിനിമയിലൂടെ അയാളെ തിരിച്ചറിയേണ്ടി വരുന്ന ഫുട്ബോളിനെ സ്നേഹിക്കുന്ന പുതിയ തലമുറയ്ക്ക് മുന്നിൽ അയാളൊരു ദുരന്തനായകനായി മാത്രമാണ് അവതരിപ്പിക്കപ്പെടുന്നത്. ഡിഫൻ‍സീവ് മിഡ്ഫീൽ‍ഡറായും സ്റ്റോപ്പർ ബാക്കായും തിളങ്ങിയ, 1995ൽ അഖിലേന്ത്യാ ഫുട്ബോൾ ഫെഡറേഷന്‍റെ ഫുട്ബോളർ ഓഫ് ദ ഇയർ ആയിരുന്ന, ഒരു കളിക്കാരന്‍റെ ചിത്രം വരച്ചു കാട്ടപ്പെടുന്നത് അങ്ങനെയാവരുത്.
1986ലെ മെർ‍ദേക്ക കപ്പ്‌ സത്യനെ ഇന്ത്യൻ ഫുട്ബോൾ ചരിത്രത്തിൽ അടയാളപ്പെടുത്തിയിരുന്നു. പി.കെ ബാനർ‍ജി സത്യന്‍റെ റോൾ റീ ഡിഫൈൻ ചെയ്തയാളെ ഒരു ഡിഫൻ‍സീവ് മിഡ് ആയി പ്രതിഷ്ഠിക്കുന്ന ടൂർ‍ണമെന്റ്. തങ്ങളേക്കാൾ കരുത്തരായ ടീമുകളോട് മുട്ടി നിന്ന ഒരിന്ത്യൻ ടീം. മലേഷ്യയോട് 3 ഗോളുകൾ‍ക്ക് തകർ‍ന്നു കൊണ്ടാണ് ഇന്ത്യ തുടങ്ങിയത്. ശക്തരായ സൗത്ത് കൊറിയക്കെതിരെ 4-3 ന് ഇന്ത്യ ജയിച്ച ത്രില്ലറിൽ വിജയം കൊണ്ടുവന്ന നിർ‍ണ്ണായകമായ ലോംഗ് റേഞ്ചർ സത്യന്‍റെ കാലുകളിൽ നിന്നായിരുന്നു. തായ്ലൻ‍ഡിനെ ഒന്നിനെതിരെ 3 ഗോളുകൾ‍ക്ക് തകർ‍ത്ത് സെമിയിൽ കടന്ന ഇന്ത്യൻ ടീമിന് മുന്നിൽ കരുത്തരായ ചെക്കോസ്ലോവാക്യയായിരുന്നു. 115 മിനുട്ടോളം ഗോളടിക്കാൻ വിടാതെ ചെക്കോസ്ലോവാക്യയെ തടഞ്ഞു നിർ‍ത്തിയ ഇന്ത്യൻ പ്രതിരോധനിരയുടെ ശക്തിദുർ‍ഗമായിരുന്നു സത്യൻ.ഇന്ത്യൻ ടീമിന്‍റെ നായക സ്ഥാനത്തേയ്ക്ക് ഉയരാൻ അധികം സമയമെടുത്തില്ല.
1992 സന്തോഷ്‌ ട്രോഫി തന്നെയാകണം സത്യന്‍റെ കരിയറിലെ രജതരേഖകളിൽ ഒന്ന്. നീണ്ട 17 വർ‍ഷങ്ങൾ‍ക്ക് ശേഷം കേരള ഫുട്ബോൾ ചരിത്രത്തിലെ ഏറ്റവും തിളക്കമാർ‍ന്ന വിജയങ്ങളിൽ ഒന്ന് സ്വന്തമാക്കിയ വർ‍ഷത്തെ ശ്രദ്ധേയമായ മത്സരം സെമിഫൈനലിൽ വെസ്റ്റ് ബംഗാളിനെതിരെയായിരുന്നു. ബംഗാളിന്റെ ആക്രമണം നയിക്കുന്നത് കേരളം സൃഷ്ടിച്ചു വിട്ട എക്കാലത്തെയും മികച്ച സ്ട്രൈക്കർ ഐ.എം വിജയനും. മലയാളികൾ‍ക്ക് ആധിപത്യമുണ്ടായിരുന്ന ഗാലറി നാടിനെ വഞ്ചിച്ചു പുറം നാടിനു വേണ്ടി കളിക്കുന്നവനെന്ന ലേബലുമായി നിൽ‍ക്കുന്ന തന്‍റെ ചോരയ്ക്ക് വേണ്ടി ആർ‍ത്തു വിളിക്കുന്നത് വിജയനിന്നും മറന്നിട്ടില്ല. ആവേശമുൾ‍ക്കൊണ്ട് തങ്ങളിൽ ഒരാളായിരുന്നിട്ടും തങ്ങൾ‍ക്കെതിരെ കളിക്കാനെത്തിയ സ്റ്റാർ ഫുട്ബോളറെ നിർ‍ദ്ദയം തടഞ്ഞു നിർ‍ത്തിയ കേരള പ്രതിരോധനിരയുടെ അമരത്ത് സത്യനായിരുന്നു. കടുത്ത ടാക്ലിംഗുകളിലൂടെ പഴയ കൂട്ടുകാരനെ തളച്ചിട്ട കേരള പ്രതിരോധ നിര അന്ന് പരുക്കൻ ഗെയിമാണ് കളിച്ചത്. മുഴുവൻ സമയത്ത് ഗോൾ രഹിത സമനിലയിൽ ബംഗാളിനെ പിടിച്ചു നിർ‍ത്തി ഷൂട്ട്‌ ഔട്ടിൽ 4-3 ന് വിജയിച്ചു കേരളം ഫൈനലിലേക്ക് കുതിക്കുന്പോൾ വിജയനൊരു പെനാൽ‍റ്റി പാഴാക്കിയിരുന്നു. ഫൈനലിൽ ഗോവയെ വീഴ്ത്തി വർ‍ഷങ്ങളുടെ വരൾ‍ച്ചക്ക് വിരാമമിട്ട് സന്തോഷ്‌ ട്രോഫി നേടിയ സ്വപ്ന സംഘത്തിന്റെ അമരക്കാരൻ... ക്യാപ്റ്റൻ... മെർ‍ദേക്ക കപ്പിൽ കൊറിയയെ ഞെട്ടിച്ച 35 വാര അകലെ നിന്നുള്ള ലോംഗ് റേഞ്ചർ പ്രശസ്തമായെങ്കിൽ അതുപോലെ ഒട്ടനവധി എണ്ണം ഓർ‍ത്തെടുക്കപ്പെടാതെ പോയിട്ടുണ്ട്.
അർ‍ഹിച്ചത് ലഭിക്കാതെ പോയൊരു ഫുട്ബോളർ എന്നത് പോലുമൊരു അണ്ടർ േസ്റ്ററ്റ്മെന്‍റ് തന്നെയാണ് ഇദ്ദേഹത്തിന്റെ കാര്യത്തിൽ. 1991 സാഫ് ഗെയിംസിൽ നായകനായി തിരഞ്ഞെടുക്കപ്പെട്ട് എത്തിയ ശേഷം നിഷ്കരുണം സത്യനെന്ന ക്യാപ്റ്റന്‍റെ ആം ബാന്റ് അഴിച്ചു സത്യജിത് ചാറ്റർ‍ജിക്ക് നൽ‍കിയ, ഫസ്റ്റ് ഇലവനിൽ നിന്ന് തന്നെ അയാളെ പുറത്താക്കിയ ജോസഫ് ഗെലി എന്ന മുൻ ഇന്ത്യൻ കോച്ച് ഒരു യാഥാർ‍ഥ്യം തന്നെയായിരുന്നു എന്നത് വിശ്വസിക്കാൻ ബുദ്ധിമുട്ടരുത്. കളിക്കളത്തിലല്ല, കളത്തിനു പുറത്തെ തനിക്ക് പരിചയമില്ലാത്ത കളികളിൽ വീണു പോയൊരു മനുഷ്യൻ. കളിക്കളത്തിലെ വെല്ലുവിളികളോട് പൊരുതി നിന്നയാൾ‍ക്ക് ജീവിതത്തിലെ തിരിച്ചടികൾ നേരിടാൻ കഴിഞ്ഞില്ല എന്നതായിരിക്കാം യാഥാർ‍ത്ഥ്യം. നിഴൽ‍പോലെ കൂടെയുണ്ടായിരുന്ന വിഷാദരോഗവും സത്യനൊരു തിരിച്ചുവരവ് സാധ്യമാക്കിയില്ല.സഹതാപം മൂത്തപ്പോൾ അയാൾ‍ക്ക് വേണ്ടി ഒരു ബെനഫിറ്റ്‌ മാച്ച് സംഘടിപ്പിക്കാനുള്ള ശ്രമങ്ങൾ അവസാന ഘട്ടത്തിലായിരുന്നു എന്ന ഹരം കൊള്ളിക്കുന്ന വാർ‍ത്ത അയാളുടെ മരണശേഷം പുറത്തു വിട്ട് ഇന്ത്യൻ ഫുട്ബോളിനെ ഞെട്ടിക്കുന്നുണ്ട് ഇന്ത്യൻ ഫുട്ബോൾ ഫെഡറേഷന്‍റെ അന്നത്തെ തലവൻ പ്രിയരഞ്ജൻ ദാസ് മുൻ‍ഷി. സത്യമായിരുന്നെങ്കിലും അല്ലെങ്കിലും ദയക്ക് കാത്തുനിൽ‍ക്കാതെ സത്യൻ മടങ്ങിയിരുന്നു. ഇന്ത്യൻ ഫുട്ബോളിൽ ലോബിയിംഗ് ശക്തമായിരുന്ന ഒരു കാലത്ത് മിതഭാഷിയായിരുന്നെങ്കിൽ കൂടെ കോന്പ്രമൈസുകൾ‍ക്ക് നിൽ‍ക്കാതെ പറയേണ്ടത് പറയേണ്ടിടത്ത് പറഞ്ഞിരുന്ന സ്വഭാവമാണ് വി.പി സത്യന്‍ എത്തേണ്ടിടത്ത് എത്താതെ പോയതിനൊരു കാരണമെന്ന് അയാളുടെ പഴയൊരു സഹകളിക്കാരൻ ഓർ‍ത്തെടുക്കുന്നുണ്ട്. കളിക്കളത്തിൽ എതിരാളികളെ സമർ‍ത്ഥമായ ടാക്കിളുകളിലൂടെ കൈകാര്യം ചെയ്തിരുന്ന മാസ്റ്റർ ടാക്ലർ‍ക്ക് കളിക്കളത്തിനു പുറത്ത് അതിനു കഴിയാതെ പോയി.
