ബസ് യാത്രയിൽ മാത്രമെന്തിന് സ്ത്രീകൾക്ക് വേർതിരിവ് ?
കൂക്കാനം റഹ്്മാൻ
ബസ്സുകളിൽ ആണും പെണ്ണും ഒന്നിച്ചിരുന്ന് യാത്ര ചെയ്യാൻ ഭയക്കുന്നവരാണ് ഇവിടുത്തുകാർ. ബസ്സുകളിൽ പെണ്ണുങ്ങൾ‍ക്കായി സീറ്റ് റിസർ‍വ്വ് ചെയ്ത് വെച്ചിട്ടുണ്ട്. സ്ത്രീയും പുരുഷനും ഒന്നിച്ചിരുന്നു യാത്ര ചെയ്താൽ എന്തോ തെറ്റുണ്ട് എന്നു തോന്നും ബസ്സുകളിലെ സീറ്റ് വിഭജനം കണ്ടാൽ. മുന്നിലൂടെ സ്ത്രീകൾ കയറണം. പിൻ‍വാതിലിലൂടെ പുരുഷന്മാർ കയറണം. ഇതും എഴുതിവെയ്ക്കപ്പെടാത്ത നിയമമാണ്. സ്ത്രീകൾ മുൻ‍വശത്ത് മാത്രമെ കൂടിനിൽ‍ക്കാവൂ. പിറകുഭാഗത്തേയ്ക്ക് അവർ‍ക്ക് പ്രവേശനമില്ല.
ഇന്ത്യയിലെ ഇതര-സംസ്ഥാനങ്ങളേക്കാൾ ബസ്സുകളിലെ ഈ വേർതിരിവ് കർ‍ശ്ശനമായി നടപ്പാക്കുന്ന സ്ഥലം കേരളം മാത്രമാണെന്ന് കാണാം. മറ്റ് സംസ്ഥാനങ്ങളിൽ ആണും പെണ്ണും ഒന്നിച്ചിരുന്നാണ് യാത്ര ചെയ്യുന്നത്. കർ‍ണ്ണാടകത്തിലും, തമിഴ്നാട്ടിലും മറ്റും ബസ്സ് യാത്ര ചെയ്തപ്പോൾ അവിടങ്ങളിലൊന്നും സീറ്റിന് ആൺ-പെൺ വേർ‍തിരിവുകൾ അനുഭവപ്പെട്ടിട്ടില്ല.
വിമാനത്തിലും ട്രെയിനിലും ഒന്നും ആളുടെ ലിംഗവ്യത്യാസം അടുത്തിരിക്കുന്ന മറ്റേയാളെ ബാധിക്കാറില്ല. ഓട്ടോറിക്ഷയിലും, ടാക്‌സിയിലും യാത്ര ചെയ്യുന്പോൾ ആൺ--പെൺ വേർ‍തിരിവില്ല. അവർ ഒന്നിച്ചിരുന്നു യാത്ര ചെയ്യുന്നു. പ്രശ്‌നങ്ങളൊന്നും ഉണ്ടാവാറുമില്ല. പെണ്ണുങ്ങളുടെ എല്ലാത്തരം ഇടപെടലുകളെയും പൊതുസമൂഹം കൗതുകത്തോടെയാണ് വീക്ഷിക്കുന്നത്. പെണ്ണിന്റെ സഞ്ചാരം, പെണ്ണിന്റെ വിദ്യാഭ്യാസം പെണ്ണിന്റെ തൊഴിൽ ഇക്കാര്യങ്ങളിലൊക്കെ പൊതുസമൂഹത്തിന് വ്യത്യസ്ത കാഴ്ചപ്പാടുകളാണ് ഇന്നും നിലനിൽ‍ക്കുന്നത്. ഇതിലൊക്കെ വിമർ‍ശനങ്ങൾ പതിവാണ്. ആക്ഷേപങ്ങൾ‍ക്കും പഞ്ഞമുണ്ടാവാറില്ല.
ബ്ലൗസിടാത്ത പെണ്ണ് ബ്ലൗസിട്ടപ്പോൾ, പെണ്ണിന്റെ അഹന്തയായിക്കണ്ടു ചില മാന്യപുരുഷ കേസരികൾ. അവർ സാരി ഉടുത്തപ്പോഴും, ചൂരിദാറ് ധരിച്ചപ്പോഴും, ജീൻ‍സ് ധരിച്ചപ്പോഴും അത്ഭുതത്തോടെ ആളുകൾ നോക്കി നിന്നു. വിമർ‍ശനം അതിശക്തമായി നടന്നു. ഇത്തരം മാറ്റങ്ങൾ പിന്നീട് ശീലമായി മാറി. അതോടെ കൗതുകങ്ങളും, വിമർ‍ശനങ്ങളും വഴിമാറി.
കേരളത്തിൽ ബസ്സുകളിലെ സീറ്റിൽ അടുത്തിരിക്കാൻ സ്ത്രീകൾ ഭയപ്പെടുന്നതിന് പല കാരണങ്ങളുമുണ്ട്. ചില പുരുഷന്മാർ സ്ത്രീകളുടെ അടുത്തിരിക്കാൻ ഇടകിട്ടിയാൽ ലൈംഗിക ഉദ്ദേശത്തോടെ തന്നെ അങ്ങ് ദേഹത്ത് ചാരിയിരിക്കും. ഉറക്കം നടിച്ച് വിടർ‍ന്നിരുന്ന് അടുത്തിരിക്കുന്ന ആളുടെ ശരീരത്തെ തലയിണയാക്കി മാറ്റുന്നവരുണ്ട്. ഇതു തന്നെ പറ്റിയ സന്ദർ‍ഭം എന്ന മട്ടിൽ പെണ്ണിന്റെ മാറത്തും മറ്റും സ്പർ‍ശിക്കുന്നവരും ഇല്ലാതില്ല. നോട്ടം കൊണ്ട് ലൈംഗികാക്രമണം നടത്തുന്നവരുണ്ട്. മോഷണം നടത്തുന്നവരേയും കണ്ടേക്കാം. ഇത്തരം ഇടപെടലുകളെ ഭയന്നാണ് സ്ത്രീകൾ ജനറൽ സീറ്റുകളിൽ പുരുഷന്മാരോടൊപ്പം ഇരിക്കാത്തത്.
കെ.എസ്.ആർ.ടി.സി ബസ്സിലെ ഒരു വനിതാ കണ്ടക്ടർ സംസാര മദ്ധ്യേ പറഞ്ഞതു കൂടി ഓർ‍ക്കുന്നു. ‘കണ്ടക്ടറുടെ സീറ്റിൽ വന്നിരിക്കുന്ന ചില പുരുഷന്മാരുടെ കോപ്രായങ്ങൾ കാണുന്പോൾ ദേഷ്യം തോന്നും അത്തരക്കാർ കൃത്രിമമായി ശരീരത്തിൽ സ്പർ‍ശിക്കാൻ ചില കാര്യങ്ങൾ ഒപ്പിക്കും. അത്തരം ആണുങ്ങൾ അടുത്തുവന്നിരിക്കുന്പോൾ തന്നെ അവരുടെ മുഖഭാവവും ശരീരചലനങ്ങളും ലൈംഗികമായി പീഡിപ്പിക്കാനുള്ള ശ്രമത്തിലാണെന്ന് തിരിച്ചറിയാൻ പറ്റും. അവരെ മാറ്റിയിരുത്തുകയോ, ഞാൻ മാറിയിരിക്കുകയോ ആണ് ചെയ്യാറ്’.
സ്ത്രീകളെ കാണുന്പോഴും, അടുത്തിരിക്കുന്പോഴും ലൈംഗികാതിക്രമം കാട്ടാൻ ഒരുന്പെടുന്ന പുരുഷനെ അങ്ങിനെ ചെയ്യാൻ ഇടയാക്കുന്ന കാര്യങ്ങളെക്കുറിച്ചും ചിന്തിക്കേണ്ടതുണ്ട്. ഒരു വിഭാഗം പുരുഷന്മാരെ ഞരന്പ് രോഗികളിൽ പെടുത്താം. അത് ചികിത്സ കൊണ്ടേ മാറ്റിയെടുക്കാൻ പറ്റൂ. മറ്റൊരുവിഭാഗം പുരുഷന്മാർ അമിതമായ ലൈംഗിക അച്ചടക്കത്തിനും, കപട സദാചാര ചിന്തമൂലം ലൈംഗിക വികാരങ്ങൾ കെട്ടിനിർ‍ത്തപ്പെട്ടവരുമാണ്. അത്തരം പുരുഷന്മാർ കിട്ടിയ അവസരം ഉപയോഗപ്പെടുത്തും.
സ്വതന്ത്രമായ ലൈംഗികാസ്വാദനത്തിന് പൂർ‍ണ്ണമായും വിലക്കേർ‍പ്പെടുത്തുന്ന സാമൂഹ്യ സാഹചര്യമാണ് അവരെ കിട്ടിയ അവസരത്തിൽ ലൈംഗികാസ്വാദനത്തിന് പ്രേരിപ്പിക്കുന്നത്. ഇന്നത്തെ വർ‍ത്തമാനകാല സാഹചര്യത്തിൽ എവിടെ ചെന്നാലും സ്ത്രീ- പുരുഷ വേർതിരിവ് കാണുന്നു. ചില ഇടങ്ങളിൽ സ്ത്രീകൾക്ക് ഭക്ഷണത്തിന് പ്രത്യേക സ്ഥലസൗകര്യവും പൊതുമീറ്റിംഗുകളിൽ സ്ത്രീകൾക്ക് പ്രത്യേക ഇരിപ്പിട സൗകര്യവും ടിക്കറ്റ് കൗണ്ടറുകളിൽ സ്ത്രീകൾക്ക് പ്രത്യേക ക്യൂവും പൊതുതിരഞ്ഞെടുപ്പു സമയത്തെ വോട്ടിംഗ് ബൂത്തുകളിൽ പോലും പ്രത്യേക ക്യൂവും കണ്ടുവരുന്നു. ഇതിന്റെയൊക്കെ ആവശ്യമുണ്ടോ എന്ന് ചർ‍ച്ച ചെയ്യണം.
എല്ലാ സീറ്റുകളും എല്ലാവർ‍ക്കും തുല്യമാണെന്ന ധാരണ സമൂഹത്തിൽ ഉണ്ടാക്കിയെടുക്കണം. കാന്പസുകളിലും ക്ലാസുമുറികളിലും ഇടകലർ‍ന്നിരിക്കണം. പൊതു ഇടങ്ങളെല്ലാം പെണ്ണുങ്ങളുടേതു കൂടിയാണെന്ന ചിന്ത പൊതുജനത്തിനുണ്ടാകണം. പ്രൈവറ്റ്, കെ.എസ്.ആർ.ടി.സി ബസ്സുകളിൽ ഇത്തരത്തിലുള്ള വേർതിരിവ് വേണ്ട, എന്ന തീരുമാനം പുതിയ സർ‍ക്കാർ നിലവിൽ വന്ന ഈ സാഹചര്യത്തിൽ ഉണ്ടായാൽ നന്ന്. ഇങ്ങിനെ ഒരു തീരുമാനം ഉണ്ടായാൽ സ്ത്രീകൾ‍ക്കുണ്ടാവുന്ന ആത്മവിശ്വാസം വർ‍ദ്ധിക്കുക തന്നെ ചെയ്യും.
ചില ബസ്സ് സ്റ്റോപ്പുകളിൽ കാണുന്ന കാഴ്ചയുണ്ട്. പിന്നിലൂടെ കയറാൻ പുരുഷന്മാർ‍ക്ക് സൗകര്യമുണ്ടായിട്ടു കൂടി മുൻ‍ഭാഗത്തെ വാതിലിലൂടെ തിക്കിത്തിരക്കി കയറാനാണ് അവർ‍ക്ക് താൽ‍പര്യം. ലക്ഷ്യം ആദ്യം സൂചിപ്പിച്ചതുതന്നെ. അത്ര സമയമെങ്കിലും സ്ത്രീകളുടെ ശരീര സ്പർ‍ശ സുഖം അനുഭവിക്കാമല്ലോ എന്ന ചിന്ത. സംവരണ സീറ്റുകൾ ഇല്ലാതായിക്കഴിഞ്ഞാൽ ഇത്തരം ഞരന്പ് രോഗത്തിനും അറുതി വരുത്താനാവും. യാത്രാസമയത്ത് ലൈംഗിക തൃഷ്ണയ്ക്ക് അറുതി വരുത്താൻ മാർ‍ഗ്ഗങ്ങളുണ്ട്. യാത്ര ചെയ്യുന്ന സ്ത്രീശരീരം യാത്ര ചെയ്യുന്ന പുരുഷശരീരത്തിന് തുല്യമാണെന്നും, യാത്ര ചെയ്യുന്ന സ്ത്രീ ശരീരത്തിനുമേൽ കടന്നു കയറാനുള്ള അവകാശം ഒരാൾ‍ക്കുമില്ലെന്നും ഉള്ള ബോധം സമൂഹത്തിനുണ്ടാകണം. സമൂഹ നന്മയ്ക്ക് സഹായകരമാകുന്നതും ആർ‍ക്കും ഉപദ്രവകരമല്ലാത്തതുമായ ലൈംഗിക സംസ്‌കാരം വളർ‍ത്തിയെടുക്കാൻ സമൂഹം തയ്യാറാവണം.
ലൈംഗികതയ്ക്ക് കാർ‍ക്കശ്യമില്ലാത്ത യൂറോപ്യൻ രാജ്യങ്ങളിൽ ലൈംഗികാതിക്രമങ്ങൾ കുറവാണെന്നാണ് കണക്കുകൾ പറയുന്നത്. ലൈംഗിക കുറ്റങ്ങളെ അതികർ‍ക്കശമായ രീതിയിൽ നേരിടുന്ന ഇസ്ലാമിക രാഷ്ട്രങ്ങളിലും ലൈംഗികാതിക്രമങ്ങൾ ചുരുക്കമാണ്. കർ‍ശനമായി ലൈംഗിക പീഡനങ്ങളും അതിക്രമങ്ങളും തടയാൻ സംവിധാനങ്ങളുള്ള കേരളത്തിൽ ഇവ ദിനേനയെന്നോണം പെരുകി വരുന്നു. പൊതുസമൂഹത്തിന് സ്വതന്ത്ര ലൈംഗികാസ്വാദനത്തിന് അവസരം നൽ‍കിയാൽ ഇതിനൊരു മാറ്റമുണ്ടാകുമോ എന്ന് സമൂഹം ചർ‍ച്ച ചെയ്യണം.
മാറ്റിയിരുത്തി, വേർപ്പെടുത്തിയാലൊന്നും സദാചാര ബോധം ഉണ്ടാവില്ല. അടുത്തടുത്ത് ബഹുമാനത്തോടെയും, സൗഹൃദത്തോടെയും ഇരുന്നാലെ മനസ്സ് തെറ്റായവഴിക്ക് നീങ്ങാതിരിക്കൂ. അടുത്തിരിക്കുന്ന ആളോട് ബഹുമാനത്തോടെ ഇടപെടുക എന്നത് ഓരോ വ്യക്തിയുടേയും ഉത്തരവാദിത്തമായി മാറണം. ഇത്തരം സദാചാര ചിന്തകൾ കുഞ്ഞുന്നാളിലേ കുട്ടികളിലേക്ക് പകർ‍ന്നു നൽ‍കാൻ കുടുംബവും, വിദ്യാലയങ്ങളും സജ്ജമാവണം.
പിൻ‍കുറിപ്പ്: കൗമാരക്കാർ‍ക്കുവേണ്ടി നടത്തിയ ലൈംഗിക വിദ്യാഭ്യാസത്തിൽ മംഗാലാപുരം ഭാഗങ്ങളിലെ കോളേജിൽ പഠിക്കുന്ന കേരളത്തിലെ ചില പെൺ‍കുട്ടികളും ആൺ‍കുട്ടികളും പങ്കെടുത്തിരുന്നു. അവർ പറഞ്ഞകാര്യം ശ്രദ്ധിക്കൂ... ‘ഇവിടുത്തെ കോളേജ് കാന്പസുകളിൽ ആൺ‍കുട്ടികളും പെൺ‍കുട്ടികളും പരസ്പരം കൈപിടിച്ച് ഒപ്പം നടക്കും. ഒപ്പം ഹോട്ടലിൽ ചെന്ന് ഭക്ഷിക്കും, ട്രയിനിൽ തൊട്ടടുത്തിരുന്ന് കളിയും ചിരിയും തമാശയും പറഞ്ഞ് യാത്രചെയ്യും. പക്ഷേ, കേരളാതിർ‍ത്തി കടന്നാൽ ഇതൊന്നും ഞങ്ങൾ ചെയ്യില്ല. ഞങ്ങൾ‍ക്ക് ഭയമാണ് ഇങ്ങിനെയൊക്കെ ഇവിടെ ചെയ്യാൻ. ഇത്തരം ഫ്രീയായിട്ടുള്ള ഇടപെടലുകൾ സംശയ ദൃഷ്ടിയോടെയാണ് കേരളീയർ കാണുന്നത്.
