‘ചെണ്ട’കൾ കൊന്പുകോർ‍ക്കുന്പോൾ...
ശരശയ്യ : നിതിൻ നാങ്ങോത്ത്
പ്രമാണിയായ മാണി സാറിന് തന്‍റെ ‘സ്വത്ത’ന്വേഷണ പരീക്ഷണങ്ങൾ നടത്താനുളള ഭൂമികയാണ് ഇന്ത്യൻ നാഷണൽ കോൺഗ്രസ്സ്. ഇസ്തിരി ചുളിയാത്ത ഖദറും വർ‍ത്തമാനവുമായി നടക്കുന്ന ട്രഡീഷണൽ ലീഡേഴ്സിന് അതിനിയും മനസ്സിലായ മട്ടില്ല.അതോണ്ടെന്തായി? കപ്പൽ മയ്യത്തും!! കേരളാ ഐഎൻസി ടൈറ്റാനിക്കിന്‍റെ മയ്യത്ത് താമസംവിനാ കാണേണ്ടി വരും. തമ്മിൽ തല്ലി ചവിട്ടിമുക്കിയും ഇരുന്നു മുക്കിയും ടൈറ്റാനിക്ക് പാതാളം പുൽ‍കിയിട്ടുണ്ട്. ഇപ്പോൾ കൊടിക്കൂറ മാത്രമേ കാണാനുളളൂ.കൊന്പുളള നേതാക്കളിൽ ചിലർ ലൈഫ്ബോട്ടു വഴി നൈസായി എസ്കേപ്പടിച്ചുകളഞ്ഞു. കുറച്ചു രക്ഷപ്പെടൽ കൂടി അവസാനശ്വാസവേളയിൽ ഉണ്ടാവും. ഏതുപാർ‍ട്ടിയുടേയും അന്ത്യശ്വാസം അതിലെ നേതാക്കൾ‍മൂലമായിരിക്കും എന്നു പറയുന്നതെത്ര ശരിയാ. മൂലക്കിരുത്താനും ചവിട്ടിയൊതുക്കാനും തേച്ചുസ്റ്റിക്കറാക്കാനും ഈ പാർ‍ട്ടിയെ കഴിച്ചേയുളളൂ ബാക്കിയെല്ലാരും.മൂലക്കിട്ട ‘മൗ’വൊക്കെ(മഴു)വായ്ത്തലമൂർ‍ച്ചിച്ച് വെളിച്ചപ്പെട്ടിട്ട് എന്താവുമോ എന്തോ? പളളി വേറെ. പള്ളിക്കൂടം വേറെ. മുല്ലപ്പളളി വേറെ. സുധാകരൻ വേറെ. ഈ കാങ്ഗ്രസ്സ് എന്നുപറയുന്ന ആൾ‍ക്കൂട്ടം അങ്ങനെയാണ് ഭായ്. ചിന്തിച്ചാൽ ഒരന്തോം തിരിയൂല.ചിന്തിച്ചില്ലേൽ ഒരു കുന്തോം കിട്ടൂലാ...
നെഹ്റു തൊപ്പിവെച്ച അവസാനത്തെ കോൺഗ്രസ്സുകാരൻ എംഎം ഹസൻ ജീയാണെന്ന് ആദ്യമേ ഉറപ്പായിരുന്നു.അല്ലേലും കോൺഗ്രസ്സ് വെറുമൊരു ആൾ‍ക്കൂട്ടപ്പാർ‍ട്ടിയാണ്.ബുക്കില്ല! ബൈലോയില്ല!! ആർ‍ക്കും എപ്പ വേണേലും എന്തു ചെണ്ടത്തരവും വിളിച്ചു കൂവാം. എത്ര മാക്രിത്തരവും പ്രവർ‍ത്തിക്കാം. ആരും ചോയിക്കൂല. ചോയിച്ചോൻ കെണിഞ്ഞു.മറ്റേ ഗ്രൂപ്പിന്‍റെ നടയടിക്ക് വിധേയനാവേണ്ടി വരും. പാർ‍ട്ടിയുടെ പോഷണമല്ല, ഗ്രൂപ്പിന്‍റെ പരിപോഷണമാണ് ഒരു രൂപാ കോൺ‍ഗ്രസ്സുകാരന്‍റെ മുക്കിയ കർ‍ത്തവ്യം. ഹൈക്കമാണ്ട് എന്ന അജ്ഞാതകോക്കസ് ഇതൊക്കെ കൃത്യമായി നിരീക്ഷിക്കുന്നുണ്ടാവും. മുൻ‍പ്രവൃത്തിമേന്മയുടെ പേരിൽ ഇടവേളകളില്ലാതെ പണി തരും. അങ്ങനെ ഉണ്ണികളായിപ്പോയ ഉണ്ണിത്താന്‍മാരും ഉണ്ണിയാർ‍ച്ചമാരും നിരവധി ഈ പാർ‍ട്ടിയിൽ.
ഒരു ഉത്സവപ്പറന്പു പോലെ വിശാലമനസ്കതയുളള ഈ പാർ‍ട്ടിയെ ഒന്നു ‘സേവിച്ചു’കളയാം എന്ന ദീനാനുകന്പയുമായാണ് അവരെത്തിയത്. കർ‍ഷകമുന്നേറ്റ കഴകം കേ.കോ പാർ‍ട്ടി. കൃഷി പച്ചപിടിച്ചോട്ടെ എന്ന ത്യാഗസന്നദ്ധതയുമായി ഹരിതലീഗും. സ്വതവേ ‘ബാക്ക്പെയിനുളള നാഷണൽ കോൺ‍ഗ്രസ്സിനെ അപ്പുറവും ഇപ്പുറവുമിരുന്ന് പച്ചെണ്ണയും മുട്ടയുടെ വെളളയും സമം ചാലിച്ച് ഉഴിച്ചലുകാർ സുഖചികിത്സ നടത്തിക്കൊടുത്തു. കിടപ്പുകാരന്‍റെ നട്ടെല്ലില്ലായ്മ തിരുമ്മലുകാർ മുതലെടുത്തു. കെപിസിസി പ്രസിഡണ്ടെങ്കിലും ഒരു കോൺ‍ഗ്രസ്സുകാരനായിരിക്കണമേ എന്നാണ് പാവം അണികളുടെ ഇപ്പോഴത്തെ നെഞ്ചുരുക്കിപ്രാർ‍ത്ഥന!! ഡോ.കണ്ണോത്ത് കരുണാകരൻ ജീ ഉണ്ടായിരുന്നേൽ കാണാമായിരുന്നു കളി. എവിടെ പോയി, പണ്ട് അടിയന്തിരാവസ്ഥ ക്ലൈമെറ്റിൽ എഐസിസിയിൽ ചെന്ന് അതിനെതിരെ വാളോങ്ങിയ ആന്‍റണിച്ചങ്കൻ? വിപ്ലവത്തിന്‍റെ ശുക്രനക്ഷത്രം വയലാർ ജീ? സരിതോർ‍ജ്ജത്തിലൂടെ തെലുങ്കുദേശത്തേക്ക് പാർ‍സൽ ചെയ്യപ്പെട്ട ചാണക്യ ചാണ്ടിസാർ? കോൺ‍ഗ്രസ്സിപ്പോൾ മുട്ടീന്നിഴയുകയാണ്. ഇനി ഒന്നീന്നേ തുടങ്ങണം.
അതായത് രമണാ, പാലാ ട്രംപും മലപ്പുറം ഉന്നും കൂടി മുഖാമുഖമിരുന്ന് കെപിസിസിയെന്ന യോഗാശ്വത്തെ തൊഴുത്തിൽ കെട്ടി. യാഗാശ്വമെന്ന് പാർ‍ട്ടിക്കുവേണ്ടി പശതേച്ചവരും പോസ്റ്ററൊട്ടിച്ചവരും വിറകുവെട്ടിയവരും പറഞ്ഞേക്കും. വെളളംകോരിയവരുടെ കൈപ്പത്തിയൊക്കെ ആരു ഗൗനിക്കുന്നു!! ചാണ്ടിസാറെ വഴിയിൽ കെട്ടിയ ചെണ്ടയാക്കാൻ നോക്കിയാൽ ഉത്സവം മുടക്കുമെന്ന് കൊളപ്പുളളി വിഷ്ണുനാഥ്. ഉണ്ട ബിരിയാണിക്ക് നന്ദി കാണിക്കുന്ന ഒറിജിനൽ ഖദറിസ്റ്റ്! ഉമ്മൻ സാറിനെന്താ കൊന്പുണ്ടോയെന്ന് കുര്യദേഹം. ജനകീയതയുടെ ഇരട്ടക്കൊന്പുണ്ടെന്ന് വെഞ്ചാമരക്കമ്മറ്റിക്കാർ. രാഷ്ട്രീയകാര്യസമിതിയിൽ കലന്പൊഴിഞ്ഞു നേരമില്ല. കോൺ‍ഗ്രസ്സെന്നാൽ കൂടിച്ചേരലല്ല, കൂടിപ്പിരിയലെന്ന് ഓക്സ്ഫോഡ് -കേംബ്രിഡ്ജുകാർ ഇതിനകം പൊത്തകത്തിൽ തിരുത്തിക്കാണണം.ചക്കിളത്തിപ്പോരാട്ടം നടത്തി നിന്നിടം കുഴിക്കുന്ന വീരപാണ്ധ്യകട്ടബൊമ്മകൾ!! പോലീസ്ഫോഴ്സിന്‍റെ സമയോചിതസഹായം കൊണ്ട് സമ്മർ‍ദ്ദത്തിലായ പിണറായി സർ‍ക്കാരെ തലങ്ങും വിലങ്ങും ആക്രമിച്ച്, അടുത്ത ഇലക്ഷൻ വരുന്പോഴേക്കും ഒരു സ്പേസ് ഉണ്ടാക്കേണ്ട സമയത്ത് പരസ്പരം പിച്ചിയും മാന്തിയും കാർ‍ക്കിച്ചു തുപ്പിയും മുഖം വികൃതമാക്കുന്ന തൂവെളളക്കാർ. അടിക്കാനറിയുന്നവരുടെ കൈയിൽ ഒരിക്കലും വടി കൊടുക്കരുത്. അത് കോൺ‍ഗ്രസ്സായാലും ബീജേപീ ആയാലും. കെ സുരേന്ദ്രനും കെ സുധാകരനും കൈ തരിച്ചിട്ടു വയ്യ. ഗ്രൂപ്പുസമവാക്യങ്ങൾ മാറിമറയുന്പോൾ ആണ്ടിയും അടിക്കാരും ഗെറ്റ് ഔട്ട്ഹൗസ്!! ബാറ്റൺ ആന്പിള്ളേർ കരഗതമാക്കും. എന്തിനാ? ഷോ കേസിൽ വെച്ച് കണ്ടോണ്ടിരിക്കാന്‍. ആയതിനാൽ മക്കളേ, ഗ്രൂപ്പേതായാലും ‘ഹൈ’കമാണ്ടിൽ വിശ്വസിച്ചു കൊൾ‍വിൻ. തീരെ വോൾ‍ട്ടില്ലാത്ത ലോ കമാണ്ടാണേലും അനുസരിച്ച് വാലാട്ടിക്കൊണ്ടേയിരിക്കുക.വാലനക്കൽ ഒരു വംശസ്വഭാവമാണ്.
വെളളക്കാരനായ എഒ ഹ്യും ഉണ്ടാക്കിയ പാർ‍ട്ടിക്ക്, പണ്ധിറ്റ് ജവഹർ‍ലാൽ നെഹ്റു ഇലക്ഷൻ കമ്മീഷണിൽ രജിസ്റ്റർ‍ചെയ്ത സ്വാതന്ത്ര്യസമരപാർ‍ട്ടിക്ക് ഇങ്ങനെയൊരു ഗതിയും പരഗതിയും വന്നു ഭവിച്ചതിൽ പെരുത്തു പ്രയാസമുണ്ട് കേട്ടാ.ദേശീയ നേതാവിന് രാഹുകാലമാണിത്. ചരിത്രത്തിൽ കൊക്കകോളചേർ‍ത്ത് പ്രയോഗിച്ചതിന് ട്രോൾ നിരോധനത്തിന്‍റെ പരിധിയിലാണ്. ഒരു പഞ്ചിനു വേണ്ടി കീച്ചിയതാ.കൊക്കകോള ഓണർ നാരങ്ങാ സർ‍ബത്ത് വിറ്റെന്നും മക്ഡൊണാൾ‍ഡ് മൂപ്പൻ തട്ടുകട നടത്തിയെന്നും. പറഞ്ഞ് കുടുങ്ങീന്ന് പറഞ്ഞാ മതീലോ? ഇങ്ങ് നേമത്ത് ഒരു ചെറിയ സംശയം ചോദിച്ച് ഏകാധ്യാപകവിദ്യാലയ ജീയും ട്രോളിങ്ങിലാണ്. രാജഗോപാൽ ജീയുടെ ചോദ്യങ്ങൾ‍ക്ക് ഉരുളയ്ക്ക് സ്റ്റീൽ‍ബോംബു പോലെയാണ് മറുപടി വന്നുകൊണ്ടിരിക്കുന്നത്. സീനിയർ നേതാക്കളെയൊക്കെ പൊതുജനം പൊതുവഴിച്ചെണ്ടയായാണ് കാണുന്നത്. ആദ്യം പിണറായി പറഞ്ഞു. വഴിച്ചെണ്ടയാക്കരുതെന്ന്. ഇന്നലെ കൂടിക്കലന്പൽ യോഗത്തിൽ ഉമ്മൻ ചാണ്ടിയുമായി, മേളക്കൊഴുപ്പുളള ചെണ്ട. ചാണ്ടി സാറിന് ഒരു കൊട്ടുകിട്ടുന്പോൾ രമേശ് ചെന്നിത്തലയ്ക്കും ടീംസിനും കിട്ടുന്നത് മുഖമടച്ച് പാഞ്ചാരീമേളം തന്നെയാണ്. പണം വാരുന്നത് അങ്ങ് മോളിലിരുന്ന് ‘വിയോജിപ്പുകളോടെ’ സ്റ്റോപ്പർ ബാക്ക് കം എക്സ് ക്യാപ്റ്റൻ എകെ ആന്‍റണി ജീയാണ്. വിസിലൂതി അങ്ങേർ ഒരു തവണ കൂടി കളം നിറഞ്ഞ് കളിച്ചാൽ ‘ഗപ്പ്’ ഇന്ദിരാ ഭവനത്തിലിരുന്നേനെ. എല്ലാവർ‍ക്കും കാൽ‍പ്പന്തുകളിയാശംസകൾ... ചവിട്ടിയും കുത്തിയും ഇടങ്കാലുവെച്ചു വീഴ്ത്തിയും ചോപ്പു കാർ‍ഡുകണ്ടും മരണക്കളിദിനാശംസകൾ..ജീവിതവും ഫുട്ബോളും രാഷ്ട്രീയവും ഒരേ നുകത്തിൽ കെട്ടിയ കാളകൾ തന്നെ. കാളപ്പോര് കളിപ്പോര്!!
