വാട്സാപ്പ് ഫെയ്ക്ക് ബുക്കിക്കാ; ഒരു ഇന്‍റർ‍നാഷണൽ ഗൂഢാലോചന...
ശരശയ്യ - നിതിൻ നാങ്ങോത്ത്
എന്നാലും ഇക്കാ ഇത് ജോറായി!! ഹർ‍ത്താൽ‍കുത്തക, പരന്പരാഗത സ്പോൺ‍സർ‍മാരിൽ നിന്നും തട്ടിപ്പറിച്ചതിന്. കേരളം പരീക്ഷണങ്ങളുടെ പൊക്രാൻ‍ലാന്‍റായിട്ട് കാലം ശ്ശി ആയി. നാടു കത്തുന്പോൾ തബലവായിക്കുന്ന നീറോ ചക്രവർ‍ത്തിമാരുണ്ടല്ലോ എന്നുളളതാണ് ഒരേയൊരു റിലാക്സേഷൻ!! സ്തംഭിപ്പിക്കും സ്തംഭിപ്പിക്കും കേരളമാകെ സ്തംഭിപ്പിക്കും... ഇനിയേത് പതിമൂന്നുകാരനും നൈസായി ഇംഗിതം നടപ്പിലാക്കാനുളള സ്പേസ് ഈ രാജ്യത്തുണ്ട്.നമിച്ചിക്കാ! വാട്സാപ്പ് ഫെയ്സ്ബുക്ക് ഇക്കാ!!
സനാഥരില്ലാത്ത ഔട്ട്പുട്ടിന് പുരാണത്തിൽ ദിവ്യഗർ‍ഭം എന്നാണ് നാമകരണം. തിങ്കളാഴ്ച ഉച്ചവരെ ആരാണ് പ്രൊഡക്ഷൻ കൺട്രോളർ എന്ന് ആർ‍ക്കും ക്ലിയറായില്ല.പിന്നീടുളള ലാത്തിച്ചാർ‍ജും ഗ്രനേഡ്ഗുണ്ടും ടയർ‍പുകയും കണ്ടപ്പോഴാണ് ഏതാണ്ട് ബോധ്യമായത്. മോക്ക്ഡ്രില്ലിന്‍റെ ഇന്‍റർ‍നാഷണൽ അജണ്ടാസ്! ബഖർ‍വാൾ ബാലികയോടുളള യുവതയുടെ കട്ടസപ്പോർ‍ട്ടും ഐക്യദാർ‍ഢ്യവും ഇങ്ങനെ റോഡ്ഷോ ആയി പരിണമിക്കുമെന്ന് വാളിൽ ഷെയർ ചെയ്ത് പ്രതിഷേധം പൊലിപ്പിച്ച കഥയറിയാ ആട്ടക്കാരാരും വിചാരിക്കാൻ വഴിയില്ല. ഞെട്ടിയത് ഭരണപക്ഷവും പ്രതിപക്ഷവും മറ്റ് ആളില്ലാ ഈർ‍ക്കിൽ കൂടാരങ്ങളുമാണ്.ഓരോരോ ഹർ‍ത്താലുകൾ വിജയിപ്പിച്ചെടുക്കാൻ അവരൊഴുക്കിയ വിയർ‍പ്പുകൾ, ചോരച്ചാലുകൾ അവർ‍ക്കേ അറിയൂ.ഇത് സംഗതി ക്ലീൻ! കൊലമാസ് ഡ്രിൽ!! ഒരു ‘മതബാർ കലാപ’ത്തിനുളള ശംഖനാദം കർ‍ണ്ണകഠോരമാവുന്നത് തിരിച്ചറിയാതെ പോവരുത്. കേരളം മതനോത്സവത്തിനുളള പറുദീസ എന്ന് അനുഭവങ്ങൾ നമ്മെ പഠിപ്പിക്കുന്നു...
ദളിത് പൂട്ടിക്കലിന്‍റെ ഹാങ്ങോവർ മാറാത്ത മല്ലൂസ് വിഷുവിന്‍റെ മാട്ടിറച്ചിയും സേമിയപ്പായസവും ഭുജിച്ച് സുഖശയനം നടത്തുന്നതിനിടെയാണ് ന്യൂസ് എത്തിയത്. നാളെ ഹർ‍ത്താൽ!! ഈ തീവ്രവാതകം മിനിറ്റുകൾ‍ക്കുളളിൽ പരപരാഗണം നടത്തി. ഏത് പൂച്ചയ്ക്കാണ് മീൻ വേണ്ടാത്തത്? മലയാളിയായിപ്പിറന്ന ആർ‍ക്കാണ് ഹർ‍ത്താലവധിയോട് അപ്രിയം? കൊടുത്തു ലൈക്ക് ആളാൾ‍വിഹിതം ഷെയറായും കാശ്മീരീമോളുടെ പിക് ആയും. മകളേ മാപ്പ്! നിനക്കായ് ഒരു ഹർ‍ത്താൽ കൂടി ഞങ്ങൾ സെലിബ്രേറ്റ് ചെയ്യുന്നു. ഹർ‍ത്താലിന്‍റെ ദുരുദ്ദേശത്തെ, നിക്ഷിപ്തലക്ഷ്യത്തെ ആസ്ഥാന ആചാര്യരും താത്ത്വികതാടിക്കാരും തളളിപ്പറഞ്ഞിട്ടുണ്ട്. ബല്യ ആശ്വാസം. കേരളത്തിൽ പതിനാറുമുതൽ അനിശ്ചിതകാല ഹർ‍ത്താൽ എന്ന വാളെഴുത്തിലെ കൗടില്യക്ലെവർ വായിച്ചെടുക്കാൻ ബുദ്ധിരാക്ഷസർ‍ക്കൊന്നും പറ്റിയില്ല എന്നത് ഠമാർ പഠാർ കോമഡിയായിത്തോന്നുന്നു. അന്താരാഷ്ട്രഅടിസ്ഥാനത്തിൽ വിജയിപ്പിച്ചെടുത്ത വലിയ കലാപങ്ങളിലെ ചിമിട്ട് തന്ത്രങ്ങൾ കിംവദന്തിയിലൂടെയായിരുന്നുവല്ലോ? എത്രയെത്ര വ്യാജഏറ്റുമുട്ടലുകൾ, പെയ്ഡ് ന്യൂസുകൾ, വികാരോത്തേജന സംഘർ‍ഷാത്മക ചൊൽ‍ക്കാഴ്ചകൾ! ആൾ‍ക്കൂട്ടമനഃശ്ശാസ്ത്രത്തെ ആളിക്കത്തിക്കുകയാണ് അട്ടിമറിക്കുളള ‘സ്മൂത്ത് വെ’. മെക്ക മസ്ജിദ് ഗോധ്ര ബൂംബൂമുകൾ ഗൂഗിൾ ചെയ്താലും, മതാന്ധത വെള്ളെഴുത്തു നൽ‍കാത്ത നല്ല മലയാളികളേ...
റേഡിയോ ജോക്കിക്ക് ‘അന്ത്യകൂദാശ’ വന്നത് ബീമാനമേറിയാണ്. ചൊല്ലും ചെയ്തും കൊട്ടേഷനും കൊറിയർ വഴി! വാളെടുപ്പുകാർ എത്രവേണേലും ഇന്നാട്ടിൽ റെഡി.കേരളത്തിൽ നടന്ന മേജർ ഓപ്പറേഷനുകളുടെ സ്കെച്ചും മാപ്പും തയ്യാറാക്കപ്പെടുന്നത് വിദേശകരങ്ങളാലാണെന്ന് നട്ടുച്ച പോലെ ക്ലിയർ. മലയാളികളിവിടെ ഭീതിയും തിന്ന് പുലരണമെന്ന് ആർ‍ക്കൊക്കെയോ നിർ‍ബന്ധമുളളതു പോലെ.ഞങ്ങളിവിടെ ജീവിച്ചുപോവുന്നതു തന്നെ നിങ്ങളയക്കുന്ന ദുട്ടിന്‍റെ ആത്മധൈര്യത്തിലാണ്. ഞങ്ങളുടെ സമാധാനവും നിങ്ങളുടെ ഔദാര്യമെന്ന് വരുന്പോഴാണ് സങ്കടം. രാഷ്ട്രീയകേന്ദ്രങ്ങൾ മുഴുവൻ നിങ്ങളുടെ എറാന്‍മൂളികളാണ്. ബിസിനസ് സാമ്രാജ്യം പിന്നെ പണ്ടേ അങ്ങനെയാണല്ലോ.. നിങ്ങൾ ഞങ്ങളുടെ ആകെയുളള ലൈഫും കൂടി അപഹരിക്കല്ലേ...കർ‍ട്ടനു പിന്നിലെ ചരടുവലിക്കാരോടാണേ ഈ താണുവീണുകേണപേക്ഷ. മതവും രാഷ്ട്രീയവും അധികാരപ്പിരാന്തും സാധാരണമല്ലൂസിന് ഗേറ്റിനപ്പുറത്തെ കാഴ്ചയാണ്. തീനായും കുടിയായും വിഷംകയറിയ മലയാളി ‘ഫിറ്റ് ഇന്ത്യ’ക്കായി ചക്കരശ്വാസം വലിക്കയാണ്. എ.ടി.എമ്മിലാണേൽ ഇന്നലെ മുതൽ നോട്ടിന്‍റെ ദന്പിടിയില്ല. സ്ട്രെസ്സും സ്ട്രെയിനും ഡിപ്രഷനും ലൈംഗികവികലാംഗത്വവും കൊണ്ട് ആകെ അൽ‍കുൽ‍ത്തായ ഞങ്ങ പാവങ്ങളെ നിങ്ങ കൂട്ടഡിലീറ്റിന് പ്രേരിപ്പിക്കല്ലേ ചങ്ങായിമാരേ. നിങ്ങക്ക് ഈ ഐഡിയോളജി അങ്ങ് ട്രംബിന്‍റെ വയലിലോ ഉന്നിന്‍റെ അന്തഃപുരത്തിലോ ചൈനയുടെ വിരിമാറിലോ ഇംപ്ലിമെന്‍റ് ചെയ്തൂടേ... പിടിഎ റിപ്പോർ‍ട്ടർ അനിൽ സോണിയുടെ അക്കൗണ്ടിലൂടെ പോയ വ്യാജവാർ‍ത്തകൾ ഒരു രാജ്യം മുഴുവൻ കത്തിയമരാൻ കാരണമായെങ്കിൽ, ഇനിയങ്ങോട്ട് എഴുതപ്പെടാനിടയുളള ഇൻ‍സ്റ്റന്‍റ് കഥകളതിസാദരങ്ങൾ പച്ചമലയാളത്തെ വെന്തമലയാളമാക്കും. മതധ്രുവീകരണക്കാർ ഇരുചേരികളിലായ് കളിക്കാർ‍ക്ക് യുണിഫോം തയ്ച്ച് കൊടുക്കും. അപ്പോഴേക്കും കക്ഷിരാഷ്ട്രീയക്കാരൊക്കെ കണ്ടംവഴി ഓടി തടി കയ്ച്ചലാക്കിയിട്ടുണ്ടാവും. വെറുപ്പിന്‍റെ പ്രത്യയശാസ്ത്രം പഠിപ്പിക്കാനൊരുങ്ങുന്ന എല്ലാ മതമേലധ്യക്ഷന്‍മാരും വികാരജീവികളായ മലയാളികളെ വെറുതെ വിടുക...
അപ്രഖ്യാപിത ഹർ‍ത്താലിനെ തുടർ‍ന്നുളള അക്രമപരാക്രമ കല്ലേറ് കണ്ണേറ് സ്പോണ്‍സേർ‍ഡ് പ്രോഗ്രാമിൽ അറസ്റ്റുകളും റെയ്ഡുകളും കേസും കൂട്ടവുമൊക്കെയായി ഈ ഏപ്രിൽ കടന്നു പോവും. നീതിക്കു വേണ്ടി പോയിന്‍റ്ബ്ലാങ്കിൽ അടരാടുന്ന ധീരവനിത ദീപിക സിംഗ് രജാവത്തിന് സിന്ദാബാദ് ഒന്നും കാണുന്നില്ലാ.. പെൺ‍കുട്ടിയുടെ കുടുംബത്തിന് സംരക്ഷണമൊരുക്കാൻ ഇവിടെ ഒരു സായാഹ്നധർ‍ണ്ണപോലുമില്ല. നമുക്ക് പ്രിയം ഒരു റിസൽ‍ട്ടും ഇതുവരെ ഉണ്ടാക്കാത്ത ബ്രിട്ടീഷുകാരുടെ കാലത്തുളള ആ പയേ ആയുധം. തുരുന്പിച്ച, പിടിയിളകിയ മലപ്പുറം പിച്ചാത്തി! ഷെയിം ഷെയിം!! സർ‍ക്കാർ കലണ്ടറിൽ ഹർ‍ത്താൽ ദിനങ്ങൾ അഡ്വാൻ‍സ്ഡായി ചോന്നവളയത്തിൽ അടയാളപ്പെടുത്താൻ ബന്ധപ്പെട്ടവർ‍ക്ക് കനിവുണ്ടാവണം. ഈ മാസം തന്നെ അപ്രഖ്യാപിത ഹർ‍ത്താൽ വിജയിച്ചുപോയതിൽ അസൂയയുളളവരുടെ വാട്സാപ്പ് കൂട്ടായ്മ ഒരു ഭാരതബന്ദിന് ഹാഷ് ടാഗ് ഒണ്ടാക്കണം. മീറ്റൂ എന്ന് വയലറ്റ് കളറിൽ പ്രൊഫൈൽ ചതുരംഗപ്പെടണം.കാറ്റുളളപ്പോൾ ദീപ ടീച്ചറെപ്പോലുളളവർ വെടിയുതിർ‍ക്കണം.ദേവിക ടീച്ചർ കുഴിബോംബുകൾ നാട്ടണം. പഴയ മാമാങ്കത്തറ പോലെ ബലാൽ‍സംഗത്തിന് പുണ്യപുരാതനവിശുദ്ധയിടങ്ങൾ കണ്ടെത്തണം. നാനോടെക്കികളായ പുരുഷൂസിന്‍റെ മതവും ജാതിയും ആധാർ‍കാർ‍ഡും നോക്കി പ്രതിഷേധവും പ്രതികരണവും സ്തംഭനവും സംഘടിപ്പിക്കണം. ശത്രുതയുളള കടക്കാരുടെ ലൊക്കേഷനും വീടും അടുത്ത ഹർ‍ത്താലിലേക്ക് ടാർ‍ഗറ്റ് ചെയ്യണം. ചുരുക്കത്തിൽ ഭരണകൂടം ആടിയുലയണം.നാട്ടാർ കുടിവെളളം കിട്ടാതെ ചാവണം. എല്ലാ നവജാതശിശുക്കളും സിറിയയിലേക്ക് കാലുംനീട്ടിയിരുന്നോളൂ..
കേംബ്രിജ് അനലിറ്റിക്ക നിങ്ങളുടെ അണ്ടർ‍വെയറിന്‍റെ ബ്രാന്‍റ് വരെ മനസ്സിലാക്കി ചോർ‍ത്തിക്കൊടുക്കുംവരെ ലാലുഅലക്സ് സലാം!! മിസ്റ്റർ മുഖ്യമന്ത്രീ, കുറച്ച് രാസായുധവിദഗ്ധരെ ആവശ്യപ്പെട്ട് ബ്രിട്ടന് മെയ്ലിടുക. അതേയുളളൂ പോംവഴി. കാപ്പാത്തേണ്ടവർ വാരാപ്പുഴയിൽ ഉരുട്ടുപരിശീലനത്തിലാണല്ലോ....
ഒരു സന്തോഷവാർ‍ത്തകൂടിയുണ്ട്. ആദിത്യനാഥന്‍റെ യൂപിയിൽ ഒരു പിഞ്ചോമനയെക്കൂടി മങ്ങലസൽ‍ക്കാരത്തിനിടെ പിച്ചിച്ചീന്തിയിരിക്കുന്നു പോലും. പതിനെട്ടുകാരനാണ് ഗുണഭോക്താവ്. ടിയാന്‍റെ ആധാർ ലിങ്ക് ചെയ്ത് കിട്ടീനില്ലാ. അപ്പോ എപ്പഴാണ് അടുത്ത ഹർ‍ത്താൽ പ്രബുദ്ധരെ?? കണ്ണിലെണ്ണയൊഴിച്ച് കൈയിൽ ആസിഡ് ബൾ‍ബും പെട്രോൾ ബോട്ടിലും കരുതി കാത്തിരിക്കുന്നു. ഡേറ്റിന്‍റെ കാര്യത്തിൽ ഒരു ജസ്റ്റ് ഹിന്‍റ് തരണേ... എല്ലാവിധ ഭാവുകങ്ങളും നേരുന്നു...
