ഹാമർ ഓൺ ദ റോക്ക് അഥവാ ‘പാറപ്ര’ത്തെ പ്രഹരം...
ശരശയ്യ - നിതിൻ നാങ്ങോത്ത്
സി.പി.എമ്മിന് ഇതെന്ത് പറ്റി? വി.ടി ബൽറാമിട്ട ചൂണ്ടയിൽ അവർ കൃത്യമായി കൊത്തിയിരിക്കുന്നു. കൊത്തി എന്നു മാത്രമല്ല ചൂണ്ടക്കൊളുത്ത് അണ്ണാക്കിൽ ചോരപൊടിയിച്ച് തറച്ചിരിക്കുന്നു. തറവേലത്തരങ്ങൾ‍ക്കൊക്കെ റിപ്ലൈയുമായി പാഞ്ഞാൽ പിന്നെ അതിനേ നേരം കാണൂ. കവല പ്രസംഗങ്ങളിൽ ആരോപണ പ്രത്യാരോപണങ്ങൾ നമ്മളെത്ര കേട്ടതാ. അതൊക്കെ ഏറ്റുപിടിച്ച് വിചാരണയ്ക്ക് വെക്കാറുണ്ടായിരുന്നോ?. അർ‍ഹിക്കുന്ന അവഗണന നൽ‍കി തള്ളിക്കളയാറായിരുന്നുവല്ലോ പതിവ്. അതെങ്ങനെയാ ചെയ്യാനോ പറയാനോ കനപ്പെട്ടതൊന്നുമില്ലേൽ ഇതുപോലെ മൂത്രത്തിൽ പിടിച്ച് തൂങ്ങി ദുർ‍ഗന്ധം സ്പ്രേ ചെയ്യും.
ബുദ്ധി മേനായ ചാണക്യ സാമാജികനാണ് ബൽ‍റാം. കല്ലെറിയുന്പോൾ ഇതുപോലെ കടന്നൽ‍ക്കൂട്ടിലോ കാക്കക്കൂട്ടിലോ എറിയണം. എത്രയെത്ര നിർ‍ജീവമേഖലകളാണ് പുനരുദ്ധരിക്കപ്പെട്ടത്? ചിന്ത പബ്ലിക്കേഷനാണ് കോളടിച്ചത്. നാനൂറ് രൂപ വിലയിട്ട എന്‍റെ ജീവിതകഥയുടെ ഒറ്റക്കോപ്പി പോലുമില്ലാ കണ്ടുപിടിക്കാൻ! ചാനൽ ചർ‍ച്ചയിൽ ഗർ‍ജിക്കാൻ ഗറില്ലകൾ തന്നെ മാക്സിമം കൊണ്ടോയി. മിച്ചം വന്നത് എഫ്.ബീയിൽ തെറിപറയാൻ സൈബർ ഗുണ്ടകളും. വായനശാലകളിലെ മാറാലകൾ‍ക്ക് ശാപമോക്ഷം കിട്ടി. ചരിത്രത്തിന് ചിറകുമുളച്ചു. വിവിധോദ്ദേശത്തിന് സുശീലാ ഗോപാലൻ, ഗൗരിയമ്മ, നെഹ്റു, മൗണ്ട്ബാറ്റൺ, പമീല, പി. കൃഷ്ണപ്പിളള, ചെകിട്ടത്തടി, ഇ.എം.എസ്, തോപ്പിൽ ഭാസി, ഗോപാൽ‍സേന... ആദിയായ ഘടാഘടിയൻ ചരിത്രപ്പൂന്തോപ്പുകൾ പുഷ്കലമായി.
സദാചാര സിഐഡികളുടെ ഈ കീഹോൾ തിയറി കേരളത്തെ ചാണകക്കുണ്ടിലെത്തിക്കും. എന്‍റെ ജീവിതകഥയിൽ മൈക്രോനോട്ടം വെക്കുന്നതിന് ബദൽ എൻഎൻ പിളളയുടെ ‘ഞാൻ’ തുപ്പലും കൂട്ടി തൊട്ടിരുന്നേൽ ഇമ്മോറൽ കേരളം കത്തിയേനേ. ഏതായാലും വണ്ടി സിവിക്കിൽ എത്തിയിട്ടുണ്ട്. ഒളിവിലെ ഓർ‍മ്മകളിലേക്കോ ഇതാണെന്‍റെ ശരിയിലേക്കോ എത്താതിരിക്കില്ല. വായന മരിക്കരുത്. വരികളിൽ ബാലപീഡനവും ഡിങ്കോൾ‍ഫിക്ക സ്റ്റുഡാൾ‍ഫിക്കേഷനും പരതി പ്രീപബ്ലിക്കേഷന് കോപ്പുണ്ടാക്കുക. കോങ്ക്രസുകാർ അക്ഷരവൈരികളാണെന്ന് മേലിൽ മിണ്ടിപ്പോവരുത്. വായിച്ച് തിരിഞ്ഞത് വിളിച്ചു കൂവാത്തത് ഇതുപോലെ ഇശ്യൂസ് ബേണ്ടാന്ന് ബെച്ചിട്ടാ.
ബിംബങ്ങളെ കല്ലെറിഞ്ഞ് കിട്ടുന്ന മൈലേജ് കേരളകൾ‍ച്ചറിന്‍റെ പുതിയ ‘പോസ്റ്റ്’ മോഡേൺ തിയറിയാണ്. ബിംബങ്ങളെ ഉടൻ കണ്ടെത്തുക. മാരകമായി മുറിവേൽ‍പ്പിക്കുന്ന രീതിയിൽ എറിയുക. ബാക്കി നാട്ടുകാർ ചെയ്തോളും. ചീപ്പ് പബ്ലിസിറ്റിയായാലും പോപ്പുലറാവാം. പോപ്പുലാരിറ്റിയിലാണ് കാര്യം. ജിമിക്കിക്കമ്മൽ ചർ‍ച്ചയിലൂടെ ചിന്താജെറോം അതിന് അസ്തിവാരമിട്ടതാണ്. ആയുസ്സ് കുറഞ്ഞുപോയി. ചുരുങ്ങിയത് ‘നീചൻ’ നിലവാരത്തിലെങ്കിലും ഫയർ ചെയ്യണം. തെറിക്കാരെ കൂലിക്കെടുത്ത് പോസ്റ്റിനുകീഴിൽ ഉറക്കമിളപ്പിക്കണം.മുട്ടൻ തെറികളുടെ കൈപ്പുസ്തകം മനഃപാഠമാക്കണം. എതിരാളികളിൽ പേജ്പൂട്ടി എക്സിറ്റ് ആവാനുളള ചേതോവികാരമുണ്ടാക്കണം. ഇലക്ഷനാണ് വരുന്നത്. നാമനിർ‍ദ്ദേശത്തിലേക്ക് പേരുകേൾ‍പ്പിക്കാനുളള എളുപ്പവഴി ഇങ്ങനെയൊക്കെയാണ്. താപ്പാനകളായ കളരിഗുരുക്കന്‍മാർ‍ക്ക് ഇക്കളി കളിക്കാനുളള താക്കത്ത് ഇല്ല. പഠിച്ചെടുക്കാനുളള മാനസികപുഷ്ടിയുമില്ല. ഇത് പതിനെട്ടിനപ്പുറമുളള ന്യൂജൻ അടവാണ്. അറിഞ്ഞ് പയറ്റേണ്ടതാണ്.എംഎം മണി, പിസി ജോർ‍ജ് കളരിയാശാന്‍മാരിൽ പ്രിലിമിനറി പാസാവാനുളള ടിപ്സുണ്ട്.സഡൻ ശിഷ്യപ്പെടുക. ഗാന്ധി തൊട്ടിങ്ങോട്ട് ഒരു കളളന്‍റെ ആത്മകഥയെഴുതിയ മണിയൻപിളളവരെയുളളവരുടെ കഥാ’കദന’ങ്ങൾ വരിവരിയായി ഗവേഷണത്തിനെടുക്കുക. സോണിയാ ഗാന്ധി, ഇന്ദിരാ ഗാന്ധി,നരസിംഹറാവു, എം.വി രാഘവൻ, ഗൗരിയമ്മ, പി കൃഷ്ണപ്പിളള, മാധവിക്കുട്ടി ആത്മകഥകളിൽ ഒരു തീപ്പൊരിക്കുളള വകുപ്പുണ്ട്. എം.എഫ് ഹുസൈൻ, സൽ‍മാൻ റുഷ്ദി, തസ്്ലീമ നസ്റീൻ, ബേനസീർ ഭൂട്ടോ, ഓങ്സാൻ‍സൂചി, പോപ്പ്, പോപ്പുലർ എഴുത്തിനെ മാന്തുന്നതാണ് ബെസ്റ്റ് ടാക്ലിംഗ്. ഫെബ്രുവരി വരെ ‘ഈട’ ഭയങ്കര തണുപ്പാണ്. തീകായാനെങ്കിലും ആളൽ അനിവാര്യമാണ്. മാക്സിമം കത്തിക്കുക. മാറിയിരുന്ന് മൗത്ത് ഓർ‍ഗനോ വീണയോ വായിക്കുക. അപരന്‍റെ വാക്കുകൾ അലോസരം പോലെ കേൾ‍ക്കുക. തെറി പറഞ്ഞും അപവാദം പ്രചരിപ്പിച്ചും വായയ്ക്ക് േസ്റ്റപ്ലെയറിടുക. സാംസ്കാരിക ഫാസിസം സിന്ദാബാദ്. ഐ ആം സം തിങ്ങ്. അതേർ‍സ് ആർ നത്തിങ്ങ്...
മഹാരഥന്‍മാരുടെ ലിംഗവിശപ്പിൽ റിസേർ‍ച്ച് ചെയ്യുകയും രതിപരാഗങ്ങളുടെ സൈകതഭൂവിൽ അതിനെ മാർ‍ക്കറ്റുചെയ്യാനും മിടുക്കുളളവർ‍ക്കാണ് ഇനി കേരളാക്കളിയിൽ മാൻ ഓഫ് ദ സീരിയസ്. അടിത്തറ ഇളകിയാലും മോന്തായം തരിപ്പണമായാലും ടെന്‍റ്കെട്ടി കീപ്പ് ചെയ്യാൻ ഇവിടെ ആളുണ്ട്. പൊടിയലമാരകളിൽ ചിതൽ‍ച്ചും ബനമേറ്റ് സുഖസുഷുപ്തിയിലമർ‍ന്ന കനൽ‍ക്കാല കേസരികളേ... നിങ്ങൾ‍ക്കുളള ശാപമോക്ഷവുമായ് ഏതോ ചുവന്ന രണ്ടു കണ്ണുകൾ യാത്രയിലാണ്... വേഗം പാരായണപ്പെടാൻ പ്രാർ‍ത്ഥനകളുണ്ടായിരിക്കണം. ചരിത്രത്തിന്‍റെ ദശാസന്ധികളിൽ അമൂൽ ബേബിമാർ‍ക്ക് നിർ‍ണ്ണായക റോളുണ്ട്.
വിടിയുടെ അടുത്ത വെടി പൊട്ടിക്കഴിഞ്ഞു. കാറും ബംഗ്ലാവും കാബിനറ്റ് റാങ്കുമുളള വെറ്ററൻ കാസ്ട്രോവിന്‍റെ ഇടനെഞ്ച് ലാക്കാക്കി കാഞ്ചി വലി!! ഇനി എന്തൊക്കെ കേൾ‍ക്കണമെന്‍റെ പറശ്ശിനി മുത്തപ്പാ. എ.കെ.ജീക്കുളളത്ര സൈബർ ഫാൻ‍സ് പുന്നപ്ര കേസരിക്ക് ഉണ്ടോ എന്ന് വൈകീട്ടോടെ അറിയാം... കരിങ്കുരങ്ങ് സ്റ്റോക്കൊക്കെ സടകുടഞ്ഞുണരട്ടെ... സ്ട്രോങ്ങുളള പദാവലീ തോന്നേണം കാലേ കാലേ... തെറി മലയാളാശംസകൾ...
പ്രിയ കലാസ്നേഹികളേ... അടുത്ത ഒരു ബെല്ലോടു കൂടി എ.കെ.ജീ ‘തീ’യേറ്റേഴ്സ് അവതരിപ്പിക്കുന്ന ഏറ്റവും പുതിയ ചരിത്രനാടകം ‘സാംസ്ക്കാരിക ഫാസിസം’ ഓൺ‍േസ്റ്റജ്... ഈ വർ‍ഷത്തെ മറ്റുനാടകങ്ങൾ.. നിങ്ങളെന്നെ കമ്മ്യൂണിസ്റ്റാക്കി. നിങ്ങളാരെ കമ്മ്യൂണിസ്റ്റാക്കി? നിങ്ങളെന്നെ കോൺ‍ഗ്രസ്സാക്കി, നിങ്ങളെന്നെ സംഘിയാക്കി... കഥാപാത്രങ്ങളും പങ്കെടുത്തവരും. ശ്രീമാൻ തോപ്പിൽ ഭാസി, സിവിക് ചന്ദ്രൻ, അബ്ദുളളക്കുട്ടി, വി.ടി ബൽ‍റാം... ടർ‍ണീംംംം...
