ഹസ്സലായി...
ശരശയ്യ - നിതിൻ നാങ്ങോത്ത്
ഓർമ്‍മകളുടെ ഭ്രമണപഥത്തിൽ കോൺഗ്രസ്സിനിപ്പോൾ ഓഖി സ്ട്രോക്കാണ്. മനസ്സിൽ കുറ്റബോധം തോന്നിത്തുടങ്ങിയാൽ ചെയ്യുന്നതെല്ലാം യാന്ത്രികമായിരിക്കും. കേരള ഖദർ‍ക്കപ്പിത്താനിൽ പഴയ രായാവിന്‍റെ മകന്‍റെ പ്രേതം ആവേശിച്ചിരിക്കുന്നു. കുറ്റബോധത്തിന്‍റെ ഡാം പൊട്ടി കുന്പസാരക്കൂട് ഒലിച്ചുപോവാതിരുന്നാ മതിയാർ‍ന്നു!! കോൺഗ്രസ് സംഘടനയെ അപകീർ‍ത്തിപ്പെടുത്തുന്ന ഡയലോഗുകൾ കാച്ചിയ കുറ്റത്തിന് പണ്ട് ശോഭനാ ജോർ‍ജ് ഫെമിനിച്ചിയെ, അന്നത്തെ പ്രസിഡണ്ട് വയലാർ‍ജി എക്സിറ്റ് അടിച്ചിരുന്നു. ഉടുമുണ്ട് രാഷ്ട്രീയത്തിന്‍റെ ആദ്യത്തെ രക്തസാക്ഷി ആയിരുന്നു ഈ മഹിളാറാണീലക്ഷ്മീ ഭായ്. ഇപ്പോ, കുറുന്തോട്ടിക്ക് തന്നെ വാത−−-പിത്ത-കഫ അസ്കിത!! ഹസ്സനാരെ ആര് കണ്ണുരുട്ടും? ഉരുട്ടേണ്ടവരൊക്കെ പാരപ്പായയിൽ ചുരുണ്ട് കിടപ്പാണ്. അപ്രതീക്ഷിതമായ ആക്രമണത്തിൽ ഇഞ്ച്വറിയായി സൈഡ് ബെഞ്ചസ്ഥരായിപ്പോയി. കാറ്റുളളപ്പോൾ തൂറ്റാനറിവുളള ചാണക്യൻ പാറ്റിവെടിയുതിർ‍ത്തു.ഒന്നും പാഴായില്ല. കോള്ളേണ്ടിടം കൃത്യമായി ചോരയാൽ നനഞ്ഞു. ഒഴിയാൻ പറഞ്ഞിരിക്കുന്ന റിസർ‍വ് ജേഴ്സിയെ മുന്നിൽ നിർ‍ത്തിയൊരു തുറുപ്പുഗുലാൻ. മെയിൻ കോച്ചിനെ പീറ്റത്തെങ്ങിലാക്കി ഒരു ഫ്ളാറ്ററിംഗ് വാണം. ആന്‍റണി ആ ക്രൂരകൃത്യത്തെ അന്ന് എതിർ‍ത്തിരുന്നു എന്ന ഗുഡ്സർ‍ട്ടിഫിക്കറ്റ്. കോച്ച് കനിഞ്ഞാൽ അടുത്ത അഞ്ചാണ്ട് ക്യാപ്റ്റൻസിയിൽ വിരാജിക്കാം. അസിസ്റ്റന്‍റ് കോച്ച് ഓക്സിജൻ പോലും കിട്ടാതെ ചുരുണ്ടു പോയ സ്ഥിതിക്ക് ഇതാണ് കറക്ട് ടൈം. കുശാഗ്രബുദ്ധിക്കാരുടെ കുത്തകയാണ് രാഷ്ട്രീയ കുരുക്ഷേത്രം. അപ്പക്കണ്ടവരെ ഡാഡീ ഡാഡീ... ഇത് താൻ റാ ആർ.കെ നഗർ പൊളിറ്റിക്സ്!!
സദാചാര തോന്ന്യാസത്തിന് എ.ഐ.സി.സി മെന്പറെ വരെ ചുങ്കിക്ക് പിടിച്ച് പുറത്തിരുത്തിയ പാർ‍ട്ടിയാ... ദിപ്പം നോ കമന്‍റ്സ്.. ഹസ്സൻ ജീയുടെ കുറ്റസമ്മതക്കൂട്ടായ്മയിൽ ഒരുമാതിരിപ്പെട്ടവരൊക്കെ തലകുലുക്കിയിട്ടുമുണ്ട്. പഴയ ഡെത്ത് വളണ്ടിയർ ചെറിയാൻ ഫിലിപ്പ് സാർ അന്നേ ഇത് വിളിച്ചു കൂവിയപ്പം ആരും മൈന്‍റ് ചെയ്തില്ല. ഇപ്പോൾ ചാനലിൽ ബാക്കികൂടി പോസ്റ്റ്മോട്ടം ചെയ്യുന്പോ കട്ടസപ്പോട്ടും ബിഗ് ഹാന്‍റും. പുത്തരിക്കണ്ടം മൈതാനിയിലൊഴുക്കിയ ലീഡറുടെ “ലാസ്റ്റ് ടിയർ‍ഗ്യാസ്” വെറുതെയായില്ല. മുതലക്കുളം മൈതാനത്ത് അന്ന് പല തൂവെളളക്കാരും ഒഴുക്കിയ മുതലക്കണ്ണീരിന്‍റെ രാഷ്ട്രീയം താമസം വിനാ റിലീസ് ചെയ്യപ്പെടും. തിരുത്തൽ‍വാദികളും മൂന്നാം ഗ്രൂപ്പുകാരുമൊക്കെ ഒന്നിച്ച് ഉലക്കമേൽ കിടന്ന് വിശാല ഐക്യമുന്നണി ആയ സ്ഥിതിക്ക് നോ പ്രോബ്ലം. ലീഡറെ കരിങ്കാലിയാക്കി പുകച്ചു പുറത്തു ചാടിച്ചതിന്‍റെ മാസ്റ്റർ ബ്രെയിൻ ആരുടേത്? ചാരക്കേസ് എന്ന ഭൂതത്തെ കുപ്പിയിൽ നിന്ന് ഇറക്കി വിട്ടതാര്? ദേശീയ മനുഷ്യാവകാശ കമ്മീഷന്‍റെ ഉത്തരവിനെ മറികടന്ന് ചാരവിധി മരവിപ്പിച്ചതിന്‍റെ പിറകിൽ കളിച്ച ഉദ്യോഗസ്ഥരാര്? ജേക്കബ് തോമസിനെപ്പോലെ നന്പിനാരായണനും നിയമത്തിന്‍റെ പടവാളെടുത്തു കഴിഞ്ഞു. തല ഒരുപാട് ഉരുളാനുണ്ട്. കബന്ധങ്ങൾ അനവധി മറവ് ചെയ്യപ്പെടാനുണ്ട്. മറിയം റഷീദ ഫൗസിയ ഹസ്സൻ, രമൺ ശ്രീവാസ്തവ, സിബി മാത്യൂസ്, മാത്യു ജോൺ, ആർ.ബി ശ്രീകുമാർ. ഇങ്ങനെ അദ്ധ്യായങ്ങളൊരുപാട് പുനർ‍വായന കൊതിച്ചിരിപ്പുണ്ട്. രമൺ ശ്രീവാസ്തവയെ കീപ്പ് ചെയ്തതിനും ചാരക്കേസ് ഒതുക്കാനും ശ്രമിച്ചതിനാണ് പതറാതെ മുന്നോട്ടുളള പ്രയാണത്തിൽ ലീഡർ പിൻവെട്ടേറ്റ് വീണുപോയത്. കൂടെ നടന്ന് കുതികാൽ വെട്ടിയവരുടെ കുറ്റബോധസ്മരണികയുടെ നാടമുറിയാണ് എം.എം ഹസ്സൻ ഗദ്ഗദം നിർ‍വ്വഹിച്ചത്. ശത്രുപാളയത്തിൽ ഇതികർ‍ത്തവ്യതാമൂഢരായി ഇരിക്കാൻ വിധിക്കപ്പെട്ട കെ. മുരളീധരനിലും പത്മജാ വേണുഗോപാലിലും എന്തുകൊണ്ടോ ശൗരി കണ്ണീരണിഞ്ഞിരിക്കും. ഇനി വലിയൊരങ്കത്തിനുളള സ്പേസ് ഈ ഒറ്റക്കാരണത്താൽ വസൂലാക്കാവുന്നതേയുളളൂ. കേരളത്തിലെ കോൺഗ്രസ്സിന്‍റെ രാഹുൽ ദശ അതിന്‍റെ മൂർദ്‍ധന്യത്തിലാണ്. വീരപാണ്ധ്യകട്ടബൊമ്മൻ കൂടൊഴിഞ്ഞു. കണ്ണൂരിലെ ന്യൂനപക്ഷവോട്ടുബാങ്ക് എയിം ചെയ്ത് ജയരാജന്‍മാർ “ഇസ്ലാമിക പലിശരഹിത ബാങ്ക്” തന്നെ ജയിൽ പരിസരത്ത് ഉദ്ഘാടിച്ച് കളഞ്ഞു. കേന്ദ്രസർ‍ക്കാർ ഈ സൊസൈറ്റിയെ സഡൻ തന്നെ പൂട്ടി സീലടിക്കുമെന്നും ബാക്കിയുളള മുസ്ലീം വിരോധം കൂടി ബീജേപ്പീ അക്കൗണ്ടിൽ ചാർ‍ത്തിക്കൊടുക്കുക എന്ന സദുദ്ദേശ്യം കൂടി പച്ചബാങ്കിന്‍റെ പിറവിക്ക് പിന്നിലുണ്ടെന്ന് “ജനം” ജനങ്ങൾ.
കേരളത്തിലെ കോൺഗ്രസ്സിന്‍റെ രാഹുൽ ദിശ ക്ലിയറായിക്കഴിഞ്ഞു. കേതു ശനി അപഹാര കാലം പാസ്ഡ് എവെ. വീരപാണ്ധ്യകട്ടബൊമ്മൻ രാജിയായി കൂടൊഴിഞ്ഞു. ശൈലജ ടീച്ചർ ഇരുപത്തെട്ടായിരത്തിന്‍റെ ദീർ‍ഘവീക്ഷണത്തിലാണ്. ഓഖി ചുഴലിയിൽ മേഴ്സിക്കുട്ടിയമ്മയുടെ വിപ്ലവവീര്യം ഒലിച്ചുപോയിട്ടുണ്ട്. ദുരന്തനിവാരണ ദുരിതാശ്വാസ കാൽ‍ക്കുലേഷൻ അബദ്ധ പഞ്ചാംഗമായെന്ന് കാര്യകാരണസഹിതം ചാക്കോ മാസ്റ്റർ വിളിച്ചു പറഞ്ഞിട്ടുണ്ട്. അൻ‍വറിന്‍റെ നീലക്കുറിഞ്ഞി വാടിക്കരിഞ്ഞിരിക്കുന്നു. മണി തിലോത്തമ ഷട്ടിൽ ടൂർ‍ണി വീക്ഷിച്ച് കഴുത്തുളുക്കി. വീണ്ടും മുഖ്യനെ ലാവലിനിൽ തളച്ചിടാനുളള എല്ലാ വലയും ഒരുക്കിയിട്ടുണ്ട്. സി.പി.ഐ ആണെങ്കിൽ കുത്താൻ ചാൻസുമായി റോന്ത് ചുറ്റുകയാണ്. എല്ലാം കൊണ്ടും ഒരു വെടിക്കെട്ട് നടത്താൻ കോൺഗ്രസ്സിന് പിച്ച് അനുകൂലമായി വരികയായിരുന്നു. അപ്പോഴാണ് ഹസ്സൻ അങ്ങുന്നിന്‍റെ പല്ലിട കുത്തി നാറ്റൽ... കോൺഗ്രസ് എന്ന വടവൃക്ഷത്തെ തകർ‍ക്കാൻ പടച്ചോനോ ഓഖിക്കോ പറ്റില്ല. കോങ്ക്രസ്സ് നശിക്കണമെങ്കിൽ അതിലെ നേതാക്കൾ തന്നെ വിചാരിക്കണം. ഇതു പോലെ... ചീഫ് സെക്രട്ടറിയുമായുളള സ്ട്രേറ്റ് ഫൈറ്റിന് അച്ചിസ്രാങ്ക് ഹരിതട്രിബ്യൂണൽ‍പ്പെട്ട് കഴിഞ്ഞു. തദ്വാരാ മൂന്നാം ആത്മഗദാബുക്കിനുളള കോപ്പുണ്ടാവും.
ഒരരികിൽ നിന്ന് നന്പി നാരായണ കലിയും മറ്റേ അരികീന്ന് പാരറ്റ് റയറ്റും കൂടിയാവുന്പോ ഭരണചക്രം ആടിയുലയും. സിൽ‍ബന്തികൾ അസ്തപ്രജ്ഞരാകും. ക്രമസമാധാനം താളം തെറ്റും. ഐ.ബിയും സി.ബി.ഐയും റോയുമൊക്കെ പിടി മുറുക്കും. ഭരണസ്തംഭനമുണ്ടാവും. കോൺഗ്രസ് തിരിച്ചുവരും. ഇങ്ങനെയൊക്കെയാണ് ആത്മവിശ്വാസമുളള ഓരോ ത്രിവർ‍ണ്ണക്കാരനും ധരിച്ചുവശായിരിക്കുന്നത്. അതിനിടയിൽ പാഷാണത്തിൽ കൃമിഞ്ഞു കൂടി ശോഭനമായ ആകാശം മേഘാവൃതമാക്കരുത്. ബ്ലീസ്...
