OMKV അഥവാ ഓട് മോനേ കണ്ടംവഴി
ശരശയ്യ - നിതിൻ നാങ്ങോത്ത്
OMKVയിലെ Mന്‍റെ പോസ്റ്റ്മോഡേൺ ഘടനാവാദ പൂർ‍ണ്ണെഴുത്ത് തൈരും കൂട്ടി ചോറ് തിന്നുന്നവർ‍ക്ക് മാത്രം മനസ്സിലാവുന്ന രീതിയിലേയ്ക്ക് പരിമിതപ്പെടുത്തിയിട്ടുണ്ട് പുതിയ ഴാക്ക് സെസ്യൂർ ദെറീദമാർ.സോഷ്യൽ മീഡിയ തുറന്നാൽ ദിപ്പോ സെപ്റ്റിക്ക് ടാങ്ക് പൊട്ടിയമാതിരിയാണ്. നാറീറ്റങ്ങ് കേരിക്കൂട.അശ്ലീലച്ചെളിവാരിയെറിയലും ഡേഷിലെ കവിവിളിയും പൂരപ്പാട്ടും പരംഭോഗവും!! ഫെമിനിച്ചികളൊക്കെ വിളന്പുന്ന തെറി രുചിച്ചിട്ട് കൊതിയാവുന്നു.തെറിമലയാളത്തിന് ശോഭനമായ ഒരു ഫാവി കാണുന്നുണ്ട്. ഒരിക്കൽ‍കൂട്ടി ശ്രേഷ്ഠഭാഷാ പട്ടുംവളയ്ക്കും ചെളിമലയാളം എലിജിബിൾ ആണ്.
നിങ്ങൾ മലപ്പുറത്തെ പെങ്കുട്ട്യോളെ കണ്ടിക്കാ?? നിങ്ങ തിര്വന്തോരത്തെ പെമ്മക്കളെ കണ്ടിക്കാ?? ഫ്ളാഷ്മോബും ഗാഢാലിംഗനവും കൊണ്ട് അവർ നവകേരളസൃഷ്ടിക്കായി ചുരിക തീർ‍ക്കുകയാണ്. പാവം ഇതൊക്കെ കണ്ട് ആവേശിച്ച് ഉറയിൽ നിന്നും ഉടവാളൂരിയ ആർ‍ജെക്കും തീക്കുനിക്കും പള്ള നിറയെ കിട്ടിബോധിച്ചു. കുന്നംകുളത്തിന്‍റെ വേൾ‍ഡ് ‘മാപ്പും‘ കൊണ്ട് സാഷ്ടാംഗം സറണ്ടറായതിന് പിന്നാലെയാണ് തടി കൈച്ചലായത്. ഇതെന്തൊരു നാടപ്പാ!! ആവിഷ്ക്കാര തോന്ന്യാസം എന്ന റൈറ്റ്സിപ്പോൾ ആരുടെ കുത്തകയാണ്. കുത്തേ കാ കേരൾ!! നാട് മുടിഞ്ഞു പോട്ടെ. ഒരാഴ്ചയിൽ ആറ് വധഭീഷണി, രണ്ട് റെയിപ്പ് വിരട്ടൽ, രണ്ട് മാപ്പുവെച്ച് കീഴടങ്ങൽ...
ഫ്ളാഷ്മോബിന് താളമിട്ടതിനാണ് പരദേശത്ത് ആർ‍ജെ സൂരജിന് പണിതെറിച്ചത്. വിവാദവിഷയങ്ങളിൽ തലയിടാനുളള ആർ‍ജെയുടെ മിടുക്ക് നിർ‍ഭയം നിരന്തരം അജീർ‍ണ്ണപ്പെട്ടതാണ്.ചോരത്തിളപ്പിന്‍റെ സമോവർ ആങ്കുട്ട്യോൾ എടുത്ത് തോട്ടിലെറിഞ്ഞു. ഞങ്ങ പെങ്കുട്ട്യോളുടെ കാര്യത്തിൽ എടപെട്ടാ സമാപറിനൊപ്പം തലയും തോട്ടിലൂടൊഴുകുമെന്ന് അവർ ഗുണദോഷിച്ചു കാണണം. ആർ ജെ സർ‍വ്വാംഗം പെട്ടിയും കിടക്കയുമെടുത്ത് പൊടി തട്ടി.. സോഷ്യൽ മീഡിയ ഒന്നടങ്കം ഞെട്ടിവിറച്ചിരിക്കുന്നതിനിടയിലാണ് അടുത്ത കതിനാവെടി മുഴങ്ങിയത്. പുക കണ്ടത് അങ്ങ് വടകര തീക്കുനി ദേശത്ത് നിന്ന്. വാക്കിൽ തീക്കനലുണ്ടായിരുന്നെങ്കിലും മണിക്കൂറുകൾ‍ക്കകം അടുപ്പിലാശാൻ ബക്കറ്റു കമിഴ്ത്തിക്കളഞ്ഞു. ശൂ...ഒരു കരിഞ്ഞ വിപ്ലവത്തിന്‍റെ മണം. ആവേശവേളയിൽ പർ‍ദ്ദ ഒരു ആഫ്രിക്കൻ രാജ്യമാണെന്നും അതിനുള്ളിലെന്തോ വിസ്‌ഫോടനം അന്ത്യവിശ്രമം കൊള്ളുന്നുവെന്ന അർ‍ത്ഥത്തിൽ ചിലത് കാച്ചി. സംഭവം നല്ല മൊഞ്ചുള്ളതായിരുന്നു.തീക്കുനിയുടെ ഈ തട്ടംപിടിച്ചുവലി ഇഷ്ടപ്പെടാത്ത ഏതോ സഹൃദയൻ ഡാ ഡാഷിലെ കവീ എന്ന് ഡർ‍ബാർ രാഗത്തിൽ ഒരു പോസ്റ്റ് നാട്ടി. വ്രണപ്പെടൽ ബോധ്യമായ തീക്കവി മാപ്പ് മാപ്പേ എന്ന് മായാമാളവ ഗൗളരാഗത്തിൽ വിതുന്പി. കവിയും കവിതയും അതോടെ സൈബർ ഗുണ്ടകൾ ഏറ്റെടുത്തു. പിന്നെ പടച്ചോനു പോലും റോളില്ല. കവിത ഹിറ്റ്, കവി സൂപ്പർ ഹിറ്റ്, കട്ട സപ്പോർ‍ട്ടുകാരൊക്കെ ഡ്യൂപ്പർ മെഗാഹിറ്റ്. സെൽ‍ഫ് പ്രമോഷന്‍റെ ഭാഗമായുളള സൈക്കളോജിക്കൽ ഡ്രാമയാണിതൊക്കെയെന്ന്, കാ എന്നു കേട്ടാൽ കയറെടുക്കുന്ന മലയാളികളെ ആരാണാവോ മൈന്‍റിലാക്കിക്കൊടുക്കുക!!
അടുത്ത ദിവസം തന്നെ “നെക്സ്റ്റ് ചെത്തിക്കളയും ഭീഷണി” എത്തി. കഥയിലെ ഒറ്റയാന്‍റെ പാപ്പാനായ എൻ പ്രഭാകരൻ മാഷ്ക്ക് നേരെയായിരുന്നു കത്തി. പുതിയ മാതൃഭൂമി വീക്കിലിയിൽ അധ്യാപകനേതാക്കളെയും പൊതുവിദ്യാഭ്യാസത്തെയും പൊള്ളിക്കുന്ന മാഷുടെ ഒരു കഥയുണ്ട്. പേര് കളിയെഴുത്ത്. എഴുത്തു വഴി മാഷ് എന്താണോ ഉദ്ദേശിച്ചത്, അതും അതിലപ്പുറവും നടന്നു. പ്രൊഫ.എം എൻ വിജയൻ ‘സ്ക്കൂളി’ന്‍റെ ഇപ്പോഴത്തെ എച്ച്ഒഡി ആയ കഥാകാരന് ശത്രുക്കളേറെ. ഒതുക്കൽ പാളം തെറ്റിയപ്പോഴേ തുടങ്ങിയതാ. ബ്രണ്ണൻ കോളേജിൽ നിന്നും അടുത്തൂൺ പറ്റിയ മാഷെ ഒന്നു ട്രോളാൻ ശത്രുക്കൾ തക്കം പാർ‍ത്തിരിക്കുകയായിരുന്നു. ക്രീഡാങ്കണത്തിന്‍റെ രൂപത്തിൽ ടിയാൻ തന്നെ ഇരയിട്ടു കൊടുത്തു. ക്ലസ്റ്റർ മീറ്റിങ്ങിൽ ഒരിക്കലെങ്കിലും ആത്മാർ‍ത്ഥമായി പങ്കുകൊണ്ട എല്ലാ മാഷമ്മാരെയും മാഷത്തിമാരെയും ഹഠാദാകർ‍ഷിക്കുന്നതാണ് കളിയെഴുത്തിലെ കളിക്കളരി. അശ്ലീലത്തിന്‍റെ പരാഗരേണുക്കൾ ദേഹത്തുപറ്റിയ സിങ്കങ്ങളൊക്കെ വാളെടുത്തു. ഫേസ് ബുക്കിലെ വാൾ (ചുമർ) എടുത്തു.ഫോണെടുത്തു. വധം സ്മാർ‍ട്ട് വഴിയാക്കി. മാഷും ഹാപ്പി. മലയാള കഥാമരുഭൂമിയും ഹാപ്പി.’ മാൻ‍കെണിയും പഴരസവും നാടകമേ ഉലകവും’ മുനകൂർ‍പ്പിച്ച് എറിഞ്ഞ കല്ലുകൾ തെല്ലൊന്നുമല്ല കടന്നൽ‍ക്കൂടുകളിൽ പരിഭ്രാന്തി സൃഷ്ടിച്ചത്. കഥയ്ക്ക് മറുവടി വധഭീഷണിയെങ്കിൽ ഉണ്ണി ആറിന്‍റെ ലീല വായിച്ച് ആനപ്പാപ്പാന്‍മാർ കേരളാബന്ദ് നടത്തണമല്ലോ!! ഈ അധ്യാപഹയന്‍മാരുടെ ഒരുകാര്യം. പൊതുവിദ്യാഭ്യാസം നീണാൾ വാഴട്ടെ. ഡുങ്കറങ്കു... ഡങ്കറുങ്കു... ഡും ഡും പീപീപീ. ക്ലസ്റ്റർ‍മേളകൾ പൊരിക്കട്ടെ. ഡിപിഇപി... പ്രഭാകരൻ മാസ്റ്റർ തെരുവിലേക്ക് നോക്കി ഇനിയും കളി പറയട്ടെ. വരാന്തയിൽ പ്ലസ് ടുക്കാരനും ടൂക്കാരിയും ആശ്ലേഷത്തിലമരുന്പോൾ ലോകം മാറിയൊഴുകട്ടെ... രണ്ടുപേർ തമ്മിൽ ചുംബിച്ചാലാണ് ’രോഗം’ ഗതിമാറിയൊഴുകാറ്...
ലാലേട്ടൻ ഒടിയനുവേണ്ടി പതിനെട്ട് കിലോ കുറച്ചതാണ് അടുത്ത ദിനം പബ്ലിക്ക് സോറിയാസിസിന് നിദാനമായത്. അഡ്വ സംഗീത ലക്ഷ്മണയൊക്കെ നല്ലോണം ക്ലോസറ്റ് കഴുകി ഹാർ‍പ്പിക്ക് വാങ്ങിച്ചു. കൊടുങ്ങല്ലൂർ ഭരണി അതിന്‍റെ പീക്കിൽ അവരുടെ വാളിലും മെസഞ്ചറിലും എത്തിയിട്ടുണ്ട്. ഐഎഫ്എഫ്കെയിലെ പെർ‍ഫോമൻ‍സിന് “ഉർ‍വശി” പാർ‍വ്വതി തിരുവോത്തിനും കസബക്കാരും സിൽ‍ബന്തികളും പാഴ്സലായി പൂരത്തെറി ടിപ്പറടിച്ചിട്ടുണ്ട്. “കക്കൂസ്” സംവിധാനിച്ചതിന് ദിവ്യാഭാരതിക്കാണ് ലേശം ജാസ്തിപ്പോയത്. വധഭീഷണി, കൂട്ടമായി റേപ്പിക്കളയും, മുഖത്ത് ആസിഡ് മഴയുടെ ആക്രോശം. പള്ളാർ സമുദായക്കാരുടെ, തമിഴ്മക്കളുടെ, സംഘപരിവാരങ്ങൾ സംഘടിച്ച് !!
ചാളവിനുവെന്ന് വിനു ജോണിനെ നിർ‍ഭയം നിരന്തരം ആക്രമിച്ച് സൈബർ കൊട്ടേഷൻ‍കാർ. ഷാനിപ്രഭാകറിനെയും സിന്ധുസൂര്യകുമാറിനെയും കണ്ണിൽ‍ച്ചോരയില്ലാതെ കബറടക്കം ചെയ്ത്... കണ്ടം വഴി ഓടിക്കോളാൻ വാണിങ്ങും നൽ‍കി ഒട്ടും സോഷ്യലല്ലാത്ത മീഡിയയിലെ പുത്തൻ കൂറ്റുകാർ... അതോടൊപ്പം യുവതുർ‍ക്കികളായ ജിഗ്നേഷ് മേവാനിക്കും അൽ‍പ്പേഷ് ഠാക്കൂറിനും നൽ‍കിക്കൊണ്ടിരിക്കുന്ന കട്ടസപ്പോർ‍ട്ട് കാണാതിരിക്കാനും പറ്റണില്ല. താപ്പാനകളോടാണ് സോഷ്യൽ‍ഗറില്ലകളുടെ അമർ‍ഷവും തേപ്പും പുച്ഛവും എന്നും കരുതേണ്ടി വരുന്നു. കരുതൽ കുറച്ചാൽ അടി തെറ്റി ഏത് കൊന്പനാനയും ധിം തരികിട ധോം... ഗുജറാത്ത് ഇലക്ഷൻ അതിനുളള സൈൻ‍ബോർ‍ഡാണ്. ജിഎസ്ടി ട്രാജഡിയിൽ നിന്നും ബിജേപ്പീ ഒരു യമത്തിനാണ് രക്ഷപ്പെട്ടത്. അല്ലേൽ മോഡിഫൈഡ് പാർ‍ട്ടി മുണ്ടും കേറ്റി കണ്ടം വഴി ഓടേണ്ടി വന്നേനേ...
