സ്വാർ‍ത്ഥവിചാരണയും കണ്ണകിയും
ശരശയ്യ - നിതിൻ നാങ്ങോത്ത്
വിമൺ എംപവർ‍മെന്‍റെന്നാൽ ശരിക്കും ദിദാണ്. കമ്മ്യൂണിസ്റ്റുകാരന്‍റെ കണ്ണിനിട്ട് സരോജ് കുമാരി, കഴുത്തിനിട്ട് സ്മൃതി ഇറാനിയും സാധ്വി പ്രാച്ചിയും. ഉമ്മച്ചന്‍റെ മിഡിൽ സ്റ്റന്പിനിട്ട് കുറിയേടത്ത് ആന്‍റിയും!! ഈ പെണ്ണുങ്ങളെയൊക്കെ ഇങ്ങനെ റോപ്പൂരി വിട്ടാൽ, പിടക്കോഴിക്കൂവൽ ഓവറായാൽ പുരുഷുകേസരീസിന് ഫോളോൺ തന്നെ സുരക്ഷ. ദുഃഖത്തിൽ കഠിനദുഃഖം ദാരിദ്ര്യദുഃഖം പോൽ നാറ്റിക്കലിൽ തീവ്രനാറ്റിക്കൽ പെണ്ണുകേസാണ്. കോൺ‍ഗ്രസ്സ് ‘എ’ടീമിനെ ലഗ് ബിഫോർ കുറ്റിയിൽ കുടുക്കാൻ പിണറായി ടീം ഉപയോഗിച്ച പിങ്ക്ബോൾ ബൂമെറാങ് ആവും എന്ന കാര്യത്തിൽ യാതൊരു ഡബിട്ടും മാണ്ട. വിവരാവകാശം കിട്ടിയാലും മേശപ്പുറത്ത് വെച്ചാലും ആറിയ കഞ്ഞി പഴങ്കഞ്ഞി!!
അഡ്ജസ്റ്റ്മെന്‍റ് രാഷ്ട്രീയത്തിന്‍റെ ഗോൾ‍കീപ്പർ‍മാരായ കേരളാസ്ട്രൈക്കേഴ്സ് കളി ഗോൾ‍രഹിതസമനിലയിൽ കലാശിപ്പിക്കും. സമനില തെറ്റുക ഇപ്പം പൊട്ടും ഇപ്പം പൊട്ടും എന്ന് ബിജാരിച്ചുപോയ പ്യാവം നുമ്മ വോട്ട്ശിരോമണികൾ‍ക്കാണ്.മണി ഇറക്കിയാൽ തീരാത്ത ഏത് കേസ്കെട്ടുണ്ട് ഈ ദുനിയാവിൽ? അറുപതാണ്ട് അതിവേഗം ബഹുദൂരം ഉണ്ടാക്കിയെടുത്ത ഇമേജൊക്കെ ഒരു സ്ത്രീയുടെ സ്വാർ‍ത്ഥവിചാരത്തിൽ (സ്മാർ‍ത്തവിചാരം) വിയർ‍ത്തുപോവുന്നത് ശരികേടല്ലേ. അപ്രത്തെ ടീമിന്‍റെ മുദ്രാവാക്യം തന്നെ ‘എല്ലാം ശരിയാക്കും’ എന്നാവുന്പോൾ ഒന്നു ശ്രദ്ധിക്കേണ്ടേ. കുടിപ്പകയ്ക്ക് ഡോക്ടറേറ്റ് കിട്ടിയ കണ്ണൂർ നേതാക്കളോട് കൊന്പുകോർ‍ക്കുന്പോൾ ട്രെയ്നിങ് അങ്ങ് സോവിയറ്റ് റഷ്യയിൽ നിന്ന് എടുക്കേണ്ടി വരും. ലാവലിൻ ടിപിയെ മങ്ങലം കയിച്ചു കൊടുക്കുന്പോൾ ഓർ‍ക്കണമായിരുന്നുവെന്ന യുവതുർ‍ക്കിയുടെ സ്ട്രേറ്റ്ഡ്രൈവിൽ കാര്യമില്ലാതില്ല. ഒറ്റരാത്രി കൊണ്ട് സെക്രട്ടറിയേറ്റ് സമരചെങ്കടൽ പയ്യാന്പലം ശ്മശാനപ്പുഴയായത് കേരളത്തിന്‍റെ സ്മരണികയിൽ തികട്ടി നിൽ‍പ്പുളളതാണല്ലോ? ചാരക്കേസു പോലെ ഇതും വെന്തു വെണ്ണീറായില്ലേൽ വല്യാശ്വാസം. കച്ചോടം കാംക്ഷിച്ച് വരുന്ന എല്ലാ യുവ (തീ) സംരംഭകർ‍ക്കും സരിതാ ചരിതം ഒരു ചാപ്റ്ററാവട്ടെ. ഈ പഠനശേഷിപ്പ് മാത്രമാവും ഈ കേസിന്‍റെയും ‘ബാക്കിപത്രം’. ടിപി കേസിൽ താൽ‍പര്യമെടുത്ത സെൻകുമാർ സാറെ ആദ്യം ശരിപ്പെടുത്തി.ഇനി തിരുവഞ്ചൂർ കളിയാട്ടം. അന്വേഷിച്ച ഉദ്യോഗസ്ഥരൊക്കെ എൻഐഎയിലും കൊന്പത്തും ചേക്കേറിയത് നന്നായി. അല്ലേൽ കാണായിരുന്നു കളി. തച്ചങ്കരി സാറിനൊക്കെ ടാർ‍ഗറ്റ് ഡെഡ് ലൈനിനുളളിൽ എച്ചീവ് ചെയ്യാൻ പറ്റുമോ എന്തോ?
സരിതാ രസായനം ടേസ്റ്റ് ചെയ്തുപോയ പുംഗവന്‍മാർ എന്തായാലും ഇപ്പോൾ പശ്ചാത്തപിക്കുന്നുണ്ടാവണം. ഈ ഓപ്പൺ ഡോർ പോളിസി ചരിത്രത്തിന്‍റെ കെണിയായിരുന്നെന്ന്. ഒന്നിനെ ചീയിച്ച് മറ്റൊന്നിന് വളമാക്കുന്നതു പോലെ കേരളരാഷ്ട്രീയം ചാപ്പന്‍മാരുടെ മേച്ചിൽ പുറങ്ങളാണ്. പിറകിലെ കുത്തും മുറിവും തടവി കരുണാകര ദേഹം അങ്ങ് ഗുരുവായൂരപ്പാ നാമം ജപിക്കുന്നുണ്ടാവണം. ഒതുക്കിയവരൊക്കെ ഒതുങ്ങിപ്പോവുന്നത് കാലത്തിന്‍റെ ക്ലൈമാക്സായി കരുതാം.
ഇനി കണ്ണകി, ഹമ്മുറാബി തീസിസിലേയ്ക്ക്. കൃത്യമായ ഇടവേളകളിൽ ദേശീയകാവിക്കാർ വാക്ക്ബോംബ് എറിയുന്നത് ലക്ഷ്യവേധം പൂർ‍ത്തിയാക്കാൻ തന്നെയാണ്. ഒരു പത്തുവർ‍ഷത്തിനുളളിൽ കേരളം അവരുടെ സങ്കൽ‍പ്പരാഷ്ട്രമാക്കാനുളള അതിബുദ്ധിചാണക്യനീക്കങ്ങളാണിതൊക്കെ.
ഈ ചൂണ്ടയിൽ സിപിഎം കൃത്യമായി കൊത്തുകയും കൊളുത്തു കൊണ്ട് ചെകിളയിൽ ചോര പൊടിയുന്നുമുണ്ട്. കോടിയേരിയുടെ, വരന്പത്തുളള രോമവർ‍ത്തമാനങ്ങൾ സംഘചേതനയെ ഉണർ‍ത്തുകയേ ഉളളൂ. നാടൊരു മിനി കമ്മ്യൂണൽ റയറ്റിലേക്കുളള ഹോംവർ‍ക്കിലാണെന്ന് കമ്മ്യൂണിസ്റ്റ് മാനിഫെസ്റ്റോക്കാരെങ്കിലും ഇപ്പഴേ മനസ്സിലാക്കിയില്ലെങ്കിൽ സംഗതി കൈവിട്ടുപോവും. ഈ ‘വാക്കൻ ട്രാജഡി’യൊക്കെ അതിലേക്കുളള ദിശാസൂചികളാണ്. തലയിലുളള യുവതയെക്കൂടി അരാഷ്ട്രീയരാക്കുന്പോൾ കാര്യങ്ങൾ കൂടുതൽ ഈസിയാവും. കൊണ്ടും കൊടുത്തും കുടുക്കിയും കുടുങ്ങിയും തേച്ചും നാറ്റിച്ചും ഇല്ലാണ്ടാവുന്നത് ഒരു നല്ലനാടിന്‍റെ പ്രബുദ്ധതയാണെന്ന് ഓർ‍മ്മവേണം. ആൺ പെൺ വ്യത്യാസമില്ലാതെ ഒരുവിഭാഗം ജനത ലഹരിക്കും പച്ചക്കാമത്തിനും മാനസികരോഗത്തിനും അടിപ്പെടുന്നതിന്‍റെ ദയനീയചിത്രം കാണാനുളള കണ്ണും കാഴ്ചപ്പാടും നമ്മുടെ ഇരട്ടച്ചങ്കും വിരിമാറുമുളള നേതാക്കൾ‍ക്കുമുണ്ടാവട്ടെ എന്ന് പ്രത്യാശിക്കാം. രതിയും സുരതവും വിപ്രലംഭശൃംഗാരവുമൊക്കെ സെക്കണ്ടറിയായി ട്രീറ്റ് ചെയ്യുന്ന മാധ്യമസംസ്ക്കാരവും വേണം. അതിന് കണ്ണുവേണമിരുപുറമെപ്പോഴും. കണ്ണുവേണം മുകളിലും താഴെയും. കണ്ണിലെപ്പോഴും കത്തിജ്ജ്വലിക്കും “ഉൾ‍ക്കണ്ണ്” വേണം അണയാത്ത കണ്ണ്. അതാരെങ്കിലും പെരയിൽ കയറി വന്ന് ചൂഴ്ന്നെടുക്കുന്നതിന് മുന്പ് ഒരു കണ്ണുരക്ഷാ യാത്ര സംഘടിപ്പിക്കുക. ഏറ്റവും കൂടുതൽ കണ്ണ് ഊരപ്പെടാൻ സാധ്യതകാണുന്ന കണ്ണൂരിൽ നിന്നു തന്നെയാവട്ടെ സ്റ്റാർ‍ട്ട് വെടി. അങ്ങനെ നേത്രോന്മീലനമാവട്ടെ കാര്യങ്ങൾ!!
നിങ്ങ ഭരണവർ‍ഗ്ഗം ജോറായിക്കോളൂ.. ഞങ്ങ ശരണംകെട്ട വർ‍ഗ്ഗം മീ ടൂ ഹാഷ് ടാഗ് കളിക്കാം.ഫാസ്റ്റുഫുഡും കഴിച്ച് മറൈൻ ഡ്രൈവിൽ പൊളിറ്റിക്സ് കളിക്കാം. പഠിക്കാൻ ഞങ്ങക്ക് മനസ്സില്ല.കണ്ടിട്ടും കൊണ്ടിട്ടും!!
