അമ്മ സ്ത്രീ, അച്ഛൻ പുരുഷൻ പുതിയ മാർഗ നിർദേശവുമായി യുഎസ്
അമ്മ സ്ത്രീയും അച്ഛൻ പുരുഷനുമാണെന്ന പുതിയ മാർഗ നിർദേശവുമായി യു.എസ് ആരോഗ്യ സെക്രട്ടറി റോബർട്ട് എഫ്. കെന്നഡി ജൂനിയർ. രണ്ട് ലിംഗക്കാർ മാത്രമേയുള്ളൂവെന്ന യു.എസ് പ്രസിഡന്റ് ഡോണൾഡ് ട്രംപിന്റെ ഫെഡറൽ നയത്തിന്റെ ഭാഗമായാണ് പ്രഖ്യാപനം.
ട്രാൻസ്‌ജെൻഡർ സ്ത്രീകളെയും പെൺകുട്ടികളെയും വനിതാ കായിക വിനോദങ്ങളിൽ നിന്ന് മാറ്റി നിർത്തുക, യുവാക്കൾക്ക് ലിംഗ ഭേദം സ്ഥിരീകരിക്കുന്ന പരിചരണം നിരുത്സാഹപ്പെടുത്തുക, ഫെഡറൽ ഗവൺമെന്റ് രണ്ട് ലിംഗക്കാരെ മാത്രമേ അംഗീകരിക്കൂ എന്ന പ്രസിഡന്റ് ഡൊണാൾഡ് ട്രംപിന്റെ പ്രതിജ്ഞ നിറവേറ്റുക എന്നിവ ലക്ഷ്യമിട്ടുള്ള ഒരു പേജുള്ള മാർഗനിർദേശത്തിലാണ് നിർവചനങ്ങൾ പട്ടികപ്പെടുത്തിയിരിക്കുന്നത്.
ബീജം ഉൽപാദിപ്പിക്കുന്ന ജൈവിക പ്രവർത്തനമുള്ള ഒരു പ്രത്യുൽപാദന വ്യവസ്ഥയാൽ സ്വഭാവ സവിശേഷതയുള്ള ലിംഗഭേദമുള്ള ഒരു വ്യക്തി എന്നാണ് മാർഗനിർദേശത്തിൽ പുരുഷനെ നിർവചിച്ചിരിക്കുന്നത്. അണ്ഡങ്ങൾ ഉൽപാദിപ്പിക്കുന്ന ജൈവിക പ്രവർത്തനമുള്ള ഒരു പ്രത്യുൽപാദന വ്യവസ്ഥയാൽ സ്വഭാവ സവിശേഷതയുള്ള ഒരു ലിംഗഭേദമുള്ള ഒരു വ്യക്തി എന്നാണ് സ്ത്രീയെ നിർവചിച്ചിരിക്കുന്നത്.
ലിംഗഭേദമെന്നത് മാറ്റമില്ലാത്ത ബയോളജിക്കലായ വര്‍ഗീകരണമാണെന്നും വ്യക്തികളെ നിര്‍ബന്ധമായും സ്ത്രീ, പുരുഷന്‍ എന്നിങ്ങനെ മാത്രമേ നിര്‍വചിക്കാന്‍ പാടുള്ളൂവെന്നും മാർഗനിർദേശത്തിലുണ്ട്.
ട്രംപ് അധികാരമേറ്റതിന് ശേഷം പ്രഖ്യാപിച്ച നയങ്ങളിലൊന്നായിരുന്നു ആണും പെണ്ണും എന്ന രണ്ട് ലിംഗക്കാര്‍ മാത്രമേയുള്ളൂവെന്നത്. ഇതിനടിസ്ഥാനമായി ലൈംഗികതയെ വ്യാഖ്യാനിക്കാനുള്ള നിര്‍വചനങ്ങള്‍ 30 ദിവസത്തിനുള്ളില്‍ അറിയിക്കാനും ട്രംപ് ആരോഗ്യവകുപ്പിനോട് നിര്‍ദേശിച്ചിരുന്നു. ഇതിന് പിന്നാലെയാണ് ആരോഗ്യ വകുപ്പിന്റെ നടപടി.
വര്‍ഷങ്ങളായുള്ള യു.എസ് നിയമങ്ങളില്‍ അച്ഛന്‍, അമ്മ എന്നതിനുപകരം രക്ഷിതാവ് ഒന്ന്, രക്ഷിതാവ് രണ്ട് എന്നാണ് രേഖപ്പെടുത്താറുള്ളത്. ഇതിനാണ് നിലവില്‍ മാറ്റം വന്നിരിക്കുന്നത്. 2011ല്‍ യു.എസ് സ്റ്റേറ്റ് ഡിപ്പാര്‍ട്ട്‌മെന്റ്, ലിംഗഭേദനയം അടിസ്ഥാനമാക്കി രക്ഷകര്‍ത്താവെന്ന പദം കാലഹരണപ്പെട്ടതാണെന്ന് പറഞ്ഞിരുന്നു. എന്നാൽ അമേരിക്കൻ അക്കാദമി ഓഫ് പീഡിയാട്രിക്സ് ഉൾപ്പെടെയുള്ള പല മെഡിക്കൽ വിദഗ്ധരും എല്ലാവരും പുരുഷന്മാർ, സ്ത്രീകൾ എന്നിങ്ങനെയുള്ള കൃത്യമായ വിഭാഗങ്ങളിൽ പെടില്ലെന്ന് തിരിച്ചറിയുന്നു. ചില വ്യക്തികൾ ഇന്റർസെക്സാണ്. അവർ പുരുഷന്മാർ, സ്ത്രീകൾ എന്നിവരുടെ സാധാരണ നിർവചനങ്ങളുമായി പൊരുത്തപ്പെടുന്നില്ല. ചില കുട്ടികൾ ലിംഗഭേദം തിരിച്ചറിയുന്നില്ല. ചിലർ ഭിന്നലിംഗ വ്യക്തികളാണെന്നും മെഡിക്കൽ വിദഗ്ധർ ചൂണ്ടിക്കാട്ടി.
