ജർ‍മന്‍ പൗരത്വം ലഭിക്കുന്നതിനുള്ള പരിഷ്കരിച്ച നടപടിക്രമങ്ങൾ പ്രാബല്യത്തിൽ
ബർ‍ലിന്‍: ജർ‍മന്‍ പൗരത്വം ലഭിക്കുന്നതിനുള്ള പരിഷ്കരിച്ച നടപടിക്രമങ്ങൾ പ്രാബല്യത്തിൽ. ഇതിൽ ഇരട്ട പൗരത്വവും ഒരു ഓപ്ഷനായി മാറും. ജനുവരി 19ന് ഫെഡറൽ പാർലമെന്റ് നിയമനിർ‍മാണം അംഗീകരിച്ചിരുന്നു. ഇരട്ട പൗരത്വം എളുപ്പമാക്കാനും യൂറോപ്യന്‍ യൂണിയന്‍ ഇതര പൗരന്മാർ‍ക്ക് സ്വാഭാവികമാക്കാനും ജർ‍മനി തീരുമാനിച്ചിട്ടുണ്ട്. എന്നാൽ ഇരട്ടപൗരത്വം ഇന്ത‍്യ അംഗീകരിക്കാത്തതിനാൽ ഇന്ത്യക്കാർ‍ക്ക് ഇത് ബാധകമാവില്ല. നിയമപരമായി ജർ‍മനിയിൽ താമസിക്കുന്ന കുടിയേറ്റക്കാർ‍ക്ക് നിലവിലെ എട്ട് വർ‍ഷത്തിനു പകരം അഞ്ച് വർ‍ഷത്തിനുശേഷം പൗരത്വത്തിന് അപേക്ഷിക്കാന്‍ അനുവദിക്കും. ഇവർ പ്രത്യേക നേട്ടങ്ങൾ പട്ടികയിൽ കൊണ്ടുവരുകയാണെങ്കിൽ, ഇത് മൂന്ന് വർ‍ഷമായി ചുരുക്കാൻ കഴിയും.
മാതാപിതാക്കളിൽ ഒരാളെങ്കിലും അഞ്ചോ അതിലധികമോ വർ‍ഷമായി രാജ്യത്ത് നിയമപരമായി താമസിക്കുന്നുണ്ടെങ്കിൽ അവർക്ക് ജനിക്കുന്ന കുട്ടികൾ‍ക്ക് സ്വയമേവ ജർ‍മന്‍ പൗരത്വം ലഭിക്കും. 67 വയസിനു മുകളിലുള്ള കുടിയേറ്റക്കാർ‍ക്ക് ജർ‍മന്‍ ഭാഷാ എഴുത്തു പരീക്ഷയ്ക്കു പകരം വാചാ പരീക്ഷ നടത്തിയാൽ മതി. സർ‍ക്കാരിന്‍റെ സാമ്പത്തിക സഹായ ഫണ്ടിൽ ജീവിക്കുന്നവർ‍ക്ക് ജർ‍മന്‍ പൗരത്വത്തിന് അർ‍ഹതയില്ല. സ്വതന്ത്ര ജനാധിപത്യ അടിസ്ഥാന ക്രമത്തോടുള്ള പ്രതിബദ്ധതയുമായി പൊരുത്തപ്പെടാത്തവർക്കും യഹൂദവിരുദ്ധ, വംശീയ, വിദ്വേഷം അല്ലെങ്കിൽ മറ്റ് അപകീർ‍ത്തികരമായ കുറ്റകൃത്യങ്ങൾ ചെയ്ത ആളുകൾ‍ക്കും ജർ‍മന്‍ പൗരത്വം ലഭിക്കില്ല.
