ബഹ്റൈൻ സമ്മർ ഫെസ്റ്റിവൽ ഇന്ന് മുതൽ ആരംഭിക്കും
ബഹ്റൈൻ സമ്മർ ഫെസ്റ്റിവൽ ഇന്ന് മുതൽ ആരംഭിക്കും. ബഹ്റൈൻ അതോറിറ്റി ഫോർ കൾച്ചർ ആന്റ് അന്റിക്വിറ്റീസ് സംഘടിപ്പിക്കുന്ന ഫെസ്റ്റിവലിന്റെ പതിനാലാമത് എഡീഷനാണ് ഇത്തവണ നടക്കുന്നത്. ഗോൾഡൻ എഡീഷൻ എന്ന പേരിട്ടിരിക്കുന്ന ഇത്തവണത്തെ സമ്മർഫെസ്റ്റിവൽ ജൂലൈ 31 വരെ നീണ്ടുനിൽക്കും. വിപുലമായ സാംസ്കാരിക പരിപാടികളാണ് ഇത്തവണ സമ്മർ ഫെസ്റ്റിവലിനോടനുബന്ധിച്ച് ബഹ്റൈൻ കൾച്ചറൽ ഹാൾ, നാഷണൽ മ്യൂസിയം, ആർട്ട് സെന്റർ എന്നീ മൂന്ന് ഇടങ്ങളിൽ അരങ്ങേറുക. കൾച്ചറൽ ഹാളിൽ നടക്കുന്ന പരിപാടികളിൽ പ്രദേശിക പ്രതിഭകളും പങ്കെടുക്കും. സൗദി സാംസ്കാരിക മന്ത്രാലയത്തിന്റെ ആഭിമുഖ്യത്തിൽ കരകൗശല വസ്തുകളെ പരിചയപ്പെടുത്തുന്നതിനായുള്ള ശിൽപ്പശാലകളും സമ്മർ ഫെസ്റ്റിവലിന്റെ ഭാഗമായി അരങ്ങേറും. നാളെ മുതൽ പതിനാലാം തീയ്യതി വരെ കൾച്ചറൽ ഹാളിൽ ലൈവ് സയൻസ് ഷോകളും അരങ്ങേറും.
