പുകവലി വിരുദ്ധ നിയമങ്ങളിൽ ഭേദഗതി വരുത്തിയ നിയമത്തിന് ബഹ്റൈൻ രാജാവിന്റെ അംഗീകാരം
രാജ്യത്ത് നിലവിലുള്ള പുകവലി വിരുദ്ധ നിയമങ്ങളിൽ ഭേദഗതി വരുത്തിയ നിയമത്തിന് ബഹ്റൈൻ രാജാവ് ഹമദ് ബിൻ ഈസ ആൽ ഖലീഫ അംഗീകാരം നൽകി. ഇതോടെ പൊതുസ്ഥലത്തെ പുകവലി തുടങ്ങിയ നിരോധിത പ്രവൃത്തികൾക്ക് പിഴത്തുക വർധിക്കും. നേരത്തെ പാർലമെന്‍റും ശൂറ കൗൺസിലും ഭേദഗതിക്ക് അംഗീകാരം നൽകിയിരുന്നു. പുകയില ഉപയോഗം നിയന്ത്രിക്കുന്നതിനും പൊതുജനാരോഗ്യം സംരക്ഷിക്കുന്നതിനും ലക്ഷ്യമിട്ടുള്ള വിവിധ നിയന്ത്രണങ്ങൾ ഉൾക്കൊള്ളുന്നതാണ് പുതിയ നിയമം.
ഇത് പ്രകാരം പൊതുഗതാഗത മാർഗങ്ങൾ, വിമാനത്താവളങ്ങൾ, തുറമുഖങ്ങൾ, സർക്കാർ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, ആരോഗ്യ കേന്ദ്രങ്ങൾ, ആരാധനാലയങ്ങൾ, സിനിമാ തിയറ്ററുകൾ തുടങ്ങിയ നിരവധി അടഞ്ഞ പൊതുസ്ഥലങ്ങളിൽ പുകവലി നിരോധിച്ചിരിക്കുകയാണ്. ഇതോടൊപ്പം രാജ്യത്ത് പുകയില കൃഷി ചെയ്യുന്നതും, പുകയില ഉൽപാദിപ്പിക്കുന്നതും, പുകയില ഉൽപന്നങ്ങൾ ഇറക്കുമതി ചെയ്യുന്നതും നിയന്ത്രണവിധേയമാകും. 18 വയസ്സിൽ താഴെയുള്ള വ്യക്തികൾക്ക് പുകയില ഉൽപന്നങ്ങൾ വിൽക്കുന്നതും സൗജന്യമായി നൽകുന്നതും നിയമവിരുദ്ധമാണ്. പുതിയ നിയമപ്രകാരം പുകയില ഉൽപന്നങ്ങളുടെ പരസ്യം, പ്രോത്സാഹനം, സ്പോൺസർഷിപ് എന്നിവ പൊതുസ്ഥലങ്ങളിലും മാധ്യമങ്ങളിലും നിരോധിച്ചിരിക്കുന്നു. സ്പോർട്സ് ക്ലബുകൾ, പാർക്കുകൾ, പൊതു പൂന്തോട്ടങ്ങൾ എന്നിവിടങ്ങളിൽ പുകവലിക്കാനുള്ള കഫേകൾക്ക് അനുമതിയുണ്ടാകില്ല.
പൊതുസ്ഥലങ്ങളിൽ പുകവലിച്ചാൽ 20 മുതൽ 50 ബഹ്റൈൻ ദീനാർ വരെ പിഴ ലഭിച്ചേക്കാം. 18 വയസ്സിൽ താഴെയുള്ളവർക്ക് പുകയില ഉൽപന്നങ്ങൾ വിൽക്കുക, പ്രായപൂർത്തിയാകാത്തവരെ പുകവലിക്കുന്ന സ്ഥലങ്ങളിൽ പ്രവേശിപ്പിക്കുന്നത്, ഒറ്റ സിഗരറ്റ് വിൽപന, അംഗീകൃതമല്ലാത്ത പാക്കേജിങ് തുടങ്ങിയവയ്ക്ക് 100 ബഹ്റൈൻ ദീനാറിൽ കുറയാത്ത പിഴ ലഭിക്കും. പുകയില കമ്പനികൾ പൊതുപരിപാടികൾ സ്പോൺസർ ചെയ്യുന്നത്, ഉപഭോക്താക്കൾക്ക് നേരിട്ട് എടുക്കാൻ കഴിയുന്ന തരത്തിലുള്ള പുകയില ഉപന്നങ്ങളുടെ പ്രദർശനം എന്നിവയ്ക്ക് 1,000 മുതൽ 3,000 ബഹ്റൈൻ ദീനാർ വരെയാണ് പിഴ.
പുകയിലക്ക് പകരമായി ഉപയോഗിക്കാൻ ഉദ്ദേശിച്ചുള്ള ഏതെങ്കിലും ഔഷധ സസ്യങ്ങളോ മറ്റ് സസ്യജന്യ വസ്തുക്കളോ നിക്കോട്ടിൻ അടങ്ങിയിട്ടില്ലെങ്കിൽ പോലും ഇറക്കുമതി ചെയ്യുന്നതും, വിതരണം ചെയ്യുന്നതും വിൽക്കുന്നതിനും നിരോധനം ഏർപ്പെടുത്തിയിട്ടുണ്ട്. ഇത് ലംഘിക്കുന്നവർക്ക് ഒരു വർഷം വരെ തടവും 1,000 മുതൽ 100,000 ബഹ്റൈൻ ദീനാർ വരെ പിഴയും അല്ലെങ്കിൽ രണ്ടും ഒരുമിച്ച് ശിക്ഷയായി ലഭിച്ചേക്കാം.
്േിേി
