ഇന്ത്യൻ കമ്മ്യൂണിറ്റി റിലീഫ് ഫണ്ട് സ്പെക്ട്ര ചിത്രരചനമത്സരത്തിന്റെ റജിസ്ട്രേഷൻ ആരംഭിച്ചു
ഇന്ത്യൻ കമ്മ്യൂണിറ്റി റിലീഫ് ഫണ്ടിന്റെ ആഭിമുഖ്യത്തിൽ എല്ലാവർഷവും നടത്തിവരാറുള്ള സ്പെക്ട്ര ചിത്രരചനമത്സരത്തിന്റെ റജിസ്ട്രേഷൻ ആരംഭിച്ചു. ഡിസംബർ ആറിന് വെള്ളിയാഴ്ച്ച ഇസാ ടൗണിലെ ഇന്ത്യൻ സ്കൂളിൽ വെച്ച് നടക്കുന്ന മത്സരത്തിന് മുന്നോടിയായി 25 വിദ്യാലയങ്ങളിൽ നിന്നുള്ള നാൽപതോളം പ്രതിനിധികളുമായി ചേർന്ന് ഐസിആർഎഫ് പ്രതിനിധികൾ കൂടികാഴ്ച്ച നടത്തി.
നാല് വ്യത്യസ്ത വിഭാഗങ്ങളായി തിരിച്ചാണ് അഞ്ച് മുതൽ പതിനാറ് വയസ് വരെ പ്രായമുള്ള വിദ്യാർത്ഥികൾ മത്സരത്തിൽ പങ്കെടുക്കുന്നത്. നേരിട്ടുള്ള റെജിസ്ട്രേഷന് പകരം വിദ്യാലയങ്ങളിലൂടെയാണ് റെജിസ്ട്രേഷൻ സ്വീകരിക്കുന്നത്.
2009 മുതൽക്കാണ് ഈ കലാമാമാങ്കം ആരംഭിച്ചത്. വിജയികളാകുന്നവരുടെ ചിത്രങ്ങൾ ഐസിആർഎഫ് കലണ്ടറിന്റെ ഭാഗമാക്കും. കൂടുതൽ വിവരങ്ങൾക്ക് സ്പെക്ട്ര കൺവീനർ മുരളീകൃഷ്ണനുമായി 34117864 അല്ലെങ്കിൽ ജോയിന്റ് കൺവീനർ നിതിനുമായി 39612819 എന്നീ നമ്പറുകളിൽ ബന്ധപ്പെടാവുന്നതാണ്.
